تۇركىستان وبلىسىندا 50 كوللەدج جۇمىس ىستەيدى. ونىڭ 28ء-ى مەملەكەتتىك بولسا، 22ء-سى – جەكەمەنشىك. ءوڭىردىڭ ەكونوميكاسىن دامىتۋدا باسىم باعىتقا يە اۋىل شارۋاشىلىعى سالاسى ماماندارىن – 10، قىزمەت كورسەتۋ جانە تۋريزم ماماندارىن – 3، قۇرىلىس سالاسى ماماندارىن 11 كوللەدج دايارلاۋدا. سونىمەن بىرگە مەديسينا، ونەر جانە گۋمانيتارلىق سالالار، پەداگوگيكا، تەحنيكالىق جانە كوپسالالى ءبىلىم مەكەمەلەرى دە بار، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسى اكىمى اپپاراتىنىڭ اپتالىق ماجىلىسىندە كوللەدجدەردە ءبىلىم ساپاسىن كوتەرۋ، تەحنيكالىق بازاسىن جاقسارتۋ جولدارى تالقىلاندى. تۇركىستان وبلىسىنىڭ اكىمى دارحان ساتىبالدى ءبىلىم باسقارماسى باسشىلىعى مەن جاۋاپتى تۇلعالارعا اتالعان ءبىلىم مەكەمەلەرىنىڭ جۇمىسىن جۇيەلەپ، قوعامعا قاجەتتى ماماندىقتار بويىنشا گرانتتى كوبەيتىپ، مەملەكەتتىك تاپسىرىستى وڭتايلاندىرۋدى تاپسىردى.
– بيۋدجەتتەن كوللەدجدەرگە قىرۋار قارجى ءبولىنىپ وتىر. ال ءبىلىم ساپاسى سوعان ساي ما؟ زەردەلەۋ، مونيتورينگ جۇمىستارىن جالعاستىرىڭىزدار. ستۋدەنتتەرى ساباققا بارمايتىن، ءبىلىم ساپاسى تومەن كوللەدج ديرەكتورلارىنىڭ ءوز لاۋازىمىنا سايكەس نەمەسە سايكەس ەمەستەرى بويىنشا ۇسىنىس بەرىڭىزدەر. جۇمىسىن دۇرىس اتقارا الماي جۇرگەندەرىنە زاڭ شەڭبەرىندە شارا كورىلسىن. وقۋ ءۇردىسىن دۇرىس ۇيلەستىرە المايتىندار ورنىن بوساتۋلارى قاجەت. ەكىنشىدەن، جاڭادان ەنگىزىلەتىن ماماندىقتار، ولاردى بىلىكتى ۇستازدارمەن قامتۋ ىسىنە تالداۋ جاسالىپ، مالىمەت ۇسىنىلسىن. بۇل ماسەلەنى تاعى دا قاراپ شىعامىز. جاتاقحانا سالۋ، قۇرال-جابدىقتار بويىنشا دا ءتيىستى ۇسىنىستار بەرىلسىن، – دەدى دارحان ساتىبالدى.
تۇركىستان وبلىستىق ءبىلىم باسقارماسى باسشىسىنىڭ ورىنباسارى ايگۇل قاسىمبەكوۆانىڭ ايتۋىنشا، وڭىردەگى كوللەدجدەردە 75 ماماندىق بويىنشا 47142 ستۋدەنت ءبىلىم الۋدا. ونىڭ 35 708ء-ى مەملەكەتتىك تاپسىرىسپەن، 11 434ء-ى اقىلى نەگىزدە ءبىلىم الادى. پەداگوگتار مەن وندىرىستىك وقىتۋ شەبەرلەرىنىڭ سانى – 3041، 214 وندىرىستىك وقىتۋ شەبەرى قىزمەت ەتەدى.
بيىلعى وقۋ جىلىنا بولىنگەن 15 525 مەملەكەتتىك تاپسىرىس ورنى تولىق يگەرىلىپ، ستۋدەنتتەر قابىلدانعان. قازىرگى تاڭدا 260 ستۋدەنت وقۋدان شىعارىلدى. ولاردىڭ اراسىندا ءوز وتىنىشتەرىمەن اسكەرگە جانە اكادەميالىق دەمالىس العاندارى بار. كوللەدج ستۋدەنتتەرىنىڭ ساباققا قاتىسۋىنا اي سايىن مونيتورينگ جۇرگىزىلەدى. مونيتورينگتى اۆتوماتتاندىرۋ ماقساتىندا 25 مەملەكەتتىك كوللەدج ءبىلىم الۋشىلاردىڭ ساباققا قاتىسۋلارىن قاشىقتان قاداعالاۋ ءۇشىن FACE ID جۇيەسىن ورناتقان.
وڭىردەگى مەملەكەتتىك 25 كوللەدجدىڭ 9-ىنىڭ بازاسى 2020-2021 جىلدارى «جاس مامان» جوباسى اياساندا رەسپۋبليكالىق بيۋدجەت ەسەبىنەن 2،5 ملرد. تەڭگەگە زاماناۋي قۇرال-جابدىقتارمەن تولىققان. 2023 جىلى وبلىستىق بيۋدجەتتەن 18 كوللەدجدىڭ بازاسىن نىعايتۋعا 1،8 ملرد. تەنگە قاراجات ءبولىنىپ، قۇرال-جابدىقتار ساتىپ الىندى. بيىل 10 كوللەدجگە 700 ملن. تەڭگە قارجى ءبولىنىپ، اعىمداعى جوندەۋ جۇمىستارى (7 كوللەدج) مەن جىلۋ جۇيەسىن گازعا اۋىستىرۋ (3 كوللەدج) جۇمىستارى جۇرۋدە. وبلىس اكىمىنىڭ تاپسىرماسىمەن وڭتۇستىك اۋداندارداعى كوللەدجدەردى IT سالاسىنا بەيىمدەۋ ماقساتىندا 1 كوللەدجگە قاجەتتى قۇرال-جابدىقتار ساتىپ الۋعا 150 ملن. تەڭگە ءبولىندى.
وبلىستاعى ارناۋلى وقۋ ورىندارىندا ستۋدەنتتەردىڭ تەوريالىق ءبىلىمىن پراكتيكامەن ۇشتاستىرۋعا باسىمدىق بەرىلۋدە. ستۋدەنتتەر ۆەتەريناريا، اۋىل شارۋاشىلىعى، كاسىپكەرلىك جانە وزگە دا سالالارعا وندىرىسكە ارالاسۋ ارقىلى بەيىمدەلۋدە. «اگرونوميا» ماماندىعىنىڭ ستۋدەنتتەرى جىلىجايدا قيار، قىزاناق، قۇلپىناي جانە باسقا دا داقىلداردى وتىرعىزۋ، باپتاۋ، تەرۋ جانە تۇتىنۋشىعا وتكىزۋ ساتىسىنا دەيىن ۇيرەنسە، تاعى ءبىر ءبىلىم ورداسىندا ستۋدەنتتەر جىبەك شارۋاشىلىعىن دامىتۋ ءۇشىن تۇت اعاشتارىن ءوسىرۋ ءىسىن مەڭگەرۋدە. بالىقتى تەرەڭ وڭدەۋ، ءىت سالاسىن دامىتۋ باعىتىن ۇيرەتۋدە دە جۇمىستار جاندانعان.
جىل سايىن 9-11 سىنىپتى بىتىرۋشىلەر سانى 77 659-دى قۇراسا كوللەدجگە 12 مىڭنان استام تۇلەك پەن 3000-عا جۋىق NEET ساناتىنداعى جاس قابىلدانادى. بيىل «WorldSkills Kazakhstan-2024» چەمپيوناتىندا تۇركىستان ءوڭىرىنىڭ كوللەدج ستۋدەنتتەرى 2 التىن، 1 كۇمىس، 4 قولا، 11 ارنايى مەدالون جەڭىپ الىپ، جالپىكوماندالىق 6-ورىندى (2023 جىلى 9-ورىندا بولعان) يەلەندى.
