Túrkistan oblysynda jańa oqý jylynda 28 mektep paidalanýǵa berildi
1 qyrkúiek – Bilim kúni qarsańynda Túrkistan oblysynda 28 jańa mektep paidalanýǵa berilip, oqýshylardy bilim nárimen sýsyndatýǵa kirisip ketti.
Shákirtteri jańa mektep ǵimaratyna kirgen bilim ordalarynyń birqatary Ordabasy aýdanynda ornalasqan. 2018-2019 jylǵy jańa oqý jylynda atalǵan aýdanda 3 mekteptiń jańa ǵimaraty el igiligine berildi. Solardyń biri 35 myńnan astam turǵyny bar Shubarsý aýylynan ashyldy. 600 oryndyq jańa ǵimaratqa qonys aýdarý saltanatyna oblys ákimi Janseiit Túimebaev arnaiy baryp, taiaý jyldary aýdanda úsh aýysymda bilim berý máselesi tolyqtai sheshiletinin jetkizdi.
– Búgin biz Ordabasy aýdany Shubarsý eldimekenindegi úsh aýysymda bilim berip kelgen «Dostyq» mektebiniń jańa oqý ǵimaratyna qonystanýynyń kýási bolyp, aýyl turǵyndarynyń qýanyshyn bólisip otyrmyz. Úsh aýysymda bilim beretin aýdandaǵy qalǵan eki mekteptiń máselesin sheshý úshin tiisti jumystar júrgizilip, aýdan ortalyǵyndaǵy Amangeldi atyndaǵy jáne «Temirlan» mektepteriniń ár qaisysyna 600 oryndyq jańa mektep salý jumystar júrgizilýde. Demek, Ordabasy aýdany boiynsha úsh aýysymdy mektepterdiń máselesi tolyq sheshiletin bolady, – degen oblys ákimi mektep ujymyna kompiýter bólmesiniń sertifikatyn tapsyrdy.
Jalpy, elimiz Táýelsizdik alǵan 27 jyl ishinde Ordabasy aýdany boiynsha 28 jańa mektep ǵimaraty salynyp paidalanýǵa berilse, onyń 5-ýi osy Shubarsý eldi mekeninde eken. Kelesi jyly, osy Shubarsý eldimekeninde taǵy bir mekteptiń qurlysyn salý úshin tiisti qujattar daiyndalyp jatyr. "Dostyq" mektebi qurylysynyń konkýrstyq quny 831745 myń teńgeni quraǵan. Oǵan ulttyq qordan, respýblikalyq jáne jergilikti biýdjetten qarjy bólingen. Bir jylda salynyp bitken ǵimarattyń jalpy alańy – 6949,6 sharshy metr. Munda 1180 oqýshy oqidy. Olarǵa 120 ustaz bilim beredi. Úsh qabatty mektepte 24 oqý kabineti, himiia, fizika, biologiia zerthanalary, mýltimediialy-lingofondy jáne kompiýter synyptary bar. Sonymen qatar, kitaphana men oqý zalymen qamtylǵan.
Endi, biyl oqýshylardyń igiligine tapsyrylǵan 28 mekteptiń sanyn jiktesek. Ordabasydaǵy Shubarsýdan bólek, jańa oqý jylynda Bereke eldi mekeni men Tespe aýyldarynda 200 oryndyq mektepterdiń qurylysy bitti. Sonymen birge, Báidibektegi Sarqyrama, Túietas, Báidibek ata jáne Turaqty eldi mekenderinde 150 oryndyq bilim oshaqtary paidalanýǵa berildi. Jańa ǵimaratqa qaryq bolǵan aýdandardyń ishinde Saryaǵash (7 mektep) pen Maqtaaral (4 mektep) aýdandary da bar. Al, Tólebi men Sairam aýdandarynda jáne Arys pen Túrkistan qalalarynda 300 jáne 600 oryndyq 2 mektepten paidalanýǵa berildi. Sondai-aq, Qazyǵurt pen Jetisai aýdandaryna bir-bir jańa mektepten buiyrdy.
Túrkistan oblysy ákiminiń baspasóz qyzmeti
