شاكىرتتەرى جاڭا مەكتەپ عيماراتىنا كىرگەن ءبىلىم وردالارىنىڭ ءبىرقاتارى ورداباسى اۋدانىندا ورنالاسقان. 2018-2019 جىلعى جاڭا وقۋ جىلىندا اتالعان اۋداندا 3 مەكتەپتىڭ جاڭا عيماراتى ەل يگىلىگىنە بەرىلدى. سولاردىڭ ءبىرى 35 مىڭنان استام تۇرعىنى بار شۇبارسۋ اۋىلىنان اشىلدى. 600 ورىندىق جاڭا عيماراتقا قونىس اۋدارۋ سالتاناتىنا وبلىس اكىمى جانسەيىت تۇيمەبايەۆ ارنايى بارىپ، تاياۋ جىلدارى اۋداندا ءۇش اۋىسىمدا ءبىلىم بەرۋ ماسەلەسى تولىقتاي شەشىلەتىنىن جەتكىزدى.
– بۇگىن ءبىز ورداباسى اۋدانى شۇبارسۋ ەلدىمەكەنىندەگى ءۇش اۋىسىمدا ءبىلىم بەرىپ كەلگەن «دوستىق» مەكتەبىنىڭ جاڭا وقۋ عيماراتىنا قونىستانۋىنىڭ كۋاسى بولىپ، اۋىل تۇرعىندارىنىڭ قۋانىشىن ءبولىسىپ وتىرمىز. ءۇش اۋىسىمدا ءبىلىم بەرەتىن اۋدانداعى قالعان ەكى مەكتەپتىڭ ماسەلەسىن شەشۋ ءۇشىن ءتيىستى جۇمىستار جۇرگىزىلىپ، اۋدان ورتالىعىنداعى امانگەلدى اتىنداعى جانە «تەمىرلان» مەكتەپتەرىنىڭ ءار قايسىسىنا 600 ورىندىق جاڭا مەكتەپ سالۋ جۇمىستار جۇرگىزىلۋدە. دەمەك، ورداباسى اۋدانى بويىنشا ءۇش اۋىسىمدى مەكتەپتەردىڭ ماسەلەسى تولىق شەشىلەتىن بولادى، – دەگەن وبلىس اكىمى مەكتەپ ۇجىمىنا كومپيۋتەر بولمەسىنىڭ سەرتيفيكاتىن تاپسىردى.
جالپى، ەلىمىز تاۋەلسىزدىك العان 27 جىل ىشىندە ورداباسى اۋدانى بويىنشا 28 جاڭا مەكتەپ عيماراتى سالىنىپ پايدالانۋعا بەرىلسە، ونىڭ 5ء-ۋى وسى شۇبارسۋ ەلدى مەكەنىندە ەكەن. كەلەسى جىلى، وسى شۇبارسۋ ەلدىمەكەنىندە تاعى ءبىر مەكتەپتىڭ قۇرلىسىن سالۋ ءۇشىن ءتيىستى قۇجاتتار دايىندالىپ جاتىر. "دوستىق" مەكتەبى قۇرىلىسىنىڭ كونكۋرستىق قۇنى 831745 مىڭ تەڭگەنى قۇراعان. وعان ۇلتتىق قوردان، رەسپۋبليكالىق جانە جەرگىلىكتى بيۋدجەتتەن قارجى بولىنگەن. ءبىر جىلدا سالىنىپ بىتكەن عيماراتتىڭ جالپى الاڭى – 6949،6 شارشى مەتر. مۇندا 1180 وقۋشى وقيدى. ولارعا 120 ۇستاز ءبىلىم بەرەدى. ءۇش قاباتتى مەكتەپتە 24 وقۋ كابينەتى، حيميا، فيزيكا، بيولوگيا زەرتحانالارى، مۋلتيمەديالى-لينگوفوندى جانە كومپيۋتەر سىنىپتارى بار. سونىمەن قاتار، كىتاپحانا مەن وقۋ زالىمەن قامتىلعان.
ەندى، بيىل وقۋشىلاردىڭ يگىلىگىنە تاپسىرىلعان 28 مەكتەپتىڭ سانىن جىكتەسەك. ورداباسىداعى شۇبارسۋدان بولەك، جاڭا وقۋ جىلىندا بەرەكە ەلدى مەكەنى مەن تەسپە اۋىلدارىندا 200 ورىندىق مەكتەپتەردىڭ قۇرىلىسى ءبىتتى. سونىمەن بىرگە، بايدىبەكتەگى سارقىراما، تۇيەتاس، بايدىبەك اتا جانە تۇراقتى ەلدى مەكەندەرىندە 150 ورىندىق ءبىلىم وشاقتارى پايدالانۋعا بەرىلدى. جاڭا عيماراتقا قارىق بولعان اۋدانداردىڭ ىشىندە سارىاعاش (7 مەكتەپ) پەن ماقتاارال (4 مەكتەپ) اۋداندارى دا بار. ال، تولەبي مەن سايرام اۋداندارىندا جانە ارىس پەن تۇركىستان قالالارىندا 300 جانە 600 ورىندىق 2 مەكتەپتەن پايدالانۋعا بەرىلدى. سونداي-اق، قازىعۇرت پەن جەتىساي اۋداندارىنا ءبىر-بىر جاڭا مەكتەپتەن بۇيىردى.
تۇركىستان وبلىسى اكىمىنىڭ باسپا ءسوز قىزمەتى
