Túrkistan oblysy ákimdiginde fýtboldy damytý máseleleri talqylanǵan jiyn ótti,- dep habarlaidy Dalanews.kz
Oblys ákimi Nuralhan Kósherov fýtboldy damytý, jas talanttardy izdeý, infraqurylymdy jaqsartý, kásibi klýbtardy demeýshiler arqyly qarjylandyrý máselelerin kóterip, jaýapty basqarma basshylary men aýdan, qala ákimderine tiisti tapsyrmalar berdi.
– Memleket basshysy Ulttyq quryltaidyń otyrysynda fýtboldy damytý joldaryn jan-jaqty qarastyrý boiynsha tapsyrmalar berdi. Kásibi klýbtardy jeke menshikke ótkizý kerektigin aitty. Búgingi tańda bul baǵytta tiisti jumystardy kórip otyrǵan joqpyn. Naqty qai aýdan, qalada fýtbolǵa laiyqtalǵan sport nysandary jetkilikti, qai jerde jetkiliksiz ekeni týraly zerdeleý júrgizilýi tiis. Kásibi fýtbol klýbtaryna bólingen qarjy, olardyń kórsetkishteri saralansyn. Óńirimizdegi klýbtar óz deńgeiinde óner kórsetip jatqan joq. Fýtbol klýbtaryna bólingen qarjy aqtaldy dei almaimyz. Fýtboldy damytýdyń, osy salany júieleýdiń josparyn ázirleńizder, – dedi Nuralhan Kósherov.
Jiynda Túrkistan oblystyq dene shynyqtyrý jáne sport basqarmasynyń basshysy Ǵalymjan Hýdiiarovtyń baiandamasy tyńdaldy. Onyń aitýynsha, Túrkistan oblysy aýmaǵynda fýtbol sportynyń damýy boiynsha 3 jylǵa arnalǵan zerdeleý jumystary júrgizildi.
Búgingi tańda oblys turǵyndarynyń fýtbolmen shuǵyldanýyna múmkindik beretin 1249 sport nysany jumys isteidi. Olardyń ishinde 21 stadion, 141 jabyq maneji, 208 alań, 879 alańsha bar. Onyń 635-i bilim berý uiymdarynyń menshiginde. 2023 jylmen salystyrǵanda 107 nysanǵa artqan. 2023-2024 jyldary 4,8 mlrd. teńgege 107 fýtbol nysany (1 fýtbol akademiiasy, 14 fýtbol maneji, 92 alańsha) salynyp, paidalanýǵa berildi Onyń ishinde jergilikti biýdjetten 1,4 mlrd teńgege 46 nysan, jeke investitsiia esebinen 3,4 mlrd teńgege 43 nysan salynǵan. Biyl 7 fýtbol maneji men 51 fýtbol alańshasynyń qurylysy júrip jatyr.
Aita keteiik, oblysta fýtbol 88 uiymda damytylyp, 13 650 bala jattyǵyp júr. Aimaqta fýtboldy damytýdyń 2025-2027 jyldarǵa arnalǵan keshendi baǵdarlamasyn ázirlenedi dep josparlanyp otyr.
