Túrkistan oblysynda eki politsiia qyzmetkeri esirtki saýdalady degen kúdikpen qolǵa tústi. Bul aqparatty Ishki ister ministrligi QazAqparat agenttiginiń resmi saýalyna jaýap retinde rastady, dep habarlaidy Dalanews.kz.
Ministrliktiń habarlaýynsha, kúdiktilerdi Ishki qaýipsizdik departamenti men Túrkistan oblystyq politsiia departamentiniń ózindik qaýipsizdik basqarmasy birlesip ustaǵan.
«Quqyqqa qaishy áreket jasady degen kúdikpen eki politsei ustalyp, ýaqytsha ustaý izoliatoryna qamaldy. Al olardyń biri qashyp ketti degen málimet shyndyqqa janaspaidy», – dedi IIM resmi ókili Shyńǵys Álekeshev.
Qazir atalǵan derek boiynsha sotqa deiingi tergeý amaldary júrgizilýde.
«Politsiia departamentinde tártiptik komissiianyń otyrysy ótti. Nátijesinde eki qyzmetker de qyzmetinen bosatyldy», – dep naqtylady Álekeshev.
Sonymen qatar, basshylyq quram ókilderine qatysty qyzmettik tekseris te bastalǵan.
Buǵan deiin jýrnalist Mihail Kozachkov óziniń Telegram-arnasynda Túrkistan oblysynda tárkilengen esirtkini qaita satyp júrgen politseiler týraly jazǵan edi. Onyń dereginshe, ustalǵandardyń biri – esirtki qylmysyna qarsy is-qimyl basqarmasy basshysynyń orynbasary, al ekinshisi – jedel ýákil bolǵan.
