تۇركىستان وبلىسىندا ەكى پوليسيا قىزمەتكەرى ەسىرتكى ساۋدالادى دەگەن كۇدىكپەن قولعا ءتۇستى. بۇل اقپاراتتى ىشكى ىستەر مينيسترلىگى قازاقپارات اگەنتتىگىنىڭ رەسمي ساۋالىنا جاۋاپ رەتىندە راستادى، دەپ حابارلايدى Dalanews.kz.
مينيسترلىكتىڭ حابارلاۋىنشا، كۇدىكتىلەردى ىشكى قاۋىپسىزدىك دەپارتامەنتى مەن تۇركىستان وبلىستىق پوليسيا دەپارتامەنتىنىڭ وزىندىك قاۋىپسىزدىك باسقارماسى بىرلەسىپ ۇستاعان.
«قۇقىققا قايشى ارەكەت جاسادى دەگەن كۇدىكپەن ەكى پوليسەي ۇستالىپ، ۋاقىتشا ۇستاۋ يزولياتورىنا قامالدى. ال ولاردىڭ ءبىرى قاشىپ كەتتى دەگەن مالىمەت شىندىققا جاناسپايدى»، – دەدى ءىىم رەسمي وكىلى شىڭعىس الەكەشيەۆ.
ءقازىر اتالعان دەرەك بويىنشا سوتقا دەيىنگى تەرگەۋ امالدارى جۇرگىزىلۋدە.
«پوليسيا دەپارتامەنتىندە تارتىپتىك كوميسسيانىڭ وتىرىسى ءوتتى. ناتيجەسىندە ەكى قىزمەتكەر دە قىزمەتىنەن بوساتىلدى»، – دەپ ناقتىلادى الەكەشيەۆ.
سونىمەن قاتار، باسشىلىق قۇرام وكىلدەرىنە قاتىستى قىزمەتتىك تەكسەرىس تە باستالعان.
بۇعان دەيىن جۋرناليست ميحايل كوزاچكوۆ ءوزىنىڭ Telegram-ارناسىندا تۇركىستان وبلىسىندا تاركىلەنگەن ەسىرتكىنى قايتا ساتىپ جۇرگەن پوليسەيلەر تۋرالى جازعان ەدى. ونىڭ دەرەگىنشە، ۇستالعانداردىڭ ءبىرى – ەسىرتكى قىلمىسىنا قارسى ءىس-قيمىل باسقارماسى باسشىسىنىڭ ورىنباسارى، ال ەكىنشىسى – جەدەل ۋاكىل بولعان.
