Saryaǵash aýdanyndaǵy Qaplanbek aýyl okrýgine qarasty Qanaǵat aýylyndaǵy №7 Tóle bi atyndaǵy jalpy bilim beretin mekteptiń 11-synyp oqýshysy Aqjúnis Atahan álemniń bedeldi 36 ýniversitetinen shaqyrtý aldy, dep habarlaidy Dalanews.kz
Halyqaralyq qatynastar mamandyǵyn tańdaǵan jas túlek dúniejúzindegi ozyq ýniversitetterde bilim alyp, óz salasyn jetik meńgergen maitalman maman bolýdy armandaidy. Álem nazaryn aýdartqan talapty oqýshynyń UBT-daǵy baǵalary da kóz qýantarlyq. Bilim synaǵynyń sońǵy nátijesi boiynsha 111 upai jinaǵan.
Aýyl mektebinde oqityn Aqjúnis Asylhanqyzy shetelde oqyp, jańa ortada ózgeniń mádenietin tanysam, bilim kókjiegimdi keńeitsem degen nietpen úzdiksiz izdengen. Nátijesinde ol Dýbai, Túrkiia, Malaiziia, Kanada, AQSh syndy damyǵan elderdegi ýniversitetterge qujatyn jiberip, 36-synan shaqyrtý alǵan. 16 jastaǵy oqýshy Amerikanyń - 17, BAÁ - 5, Túrkiianyń - 6, Malaiziianyń - 5 ýniversitetiniń grantyn utyp alyp, Kanadanyń 1 ýniversitetine prezidenttik stipendiiamen oqýǵa shaqyrtylyp otyr.
Mektep tabaldyryǵyn attaǵan sátten bastap úzdikter taqtasynan túspegen Aqjúnis Atahan oqýda ozat, izdenimpaz oqýshylardyń qatarynan kórinip keledi. Aqjúnistiń jetistigi - óńirdegi ózge oqýshylardy qanattandyrdy. Óitkeni ol atalmysh bilim ordasynan sheteldik oqý oryndarynan shaqyrtý alǵan alǵashqy shákirt.
