Aǵymdaǵy jyldyń shilde aıynda shekteý is-sharalaryn engizilýine baılanysty tabystaryn joǵaltqan muqtaj azamattarǵa eń tómengi jalaqy (42 500 teńge) mólsherinde birjolǵy tólem júzege asyrylatyny belgilendi. Qazirgi tańda Túrkistan oblysy boıynsha 297,8 azamatqa 11,3 mlrd.teńgege áleýmettik tólemder berildi.
– Jalaqysy saqtalmaıtyn demalysta júrgen jáne tólemge quqyǵy bar qyzmetkerlerdiń tizimin jumys berýshiler egov.kz jáne 42500.enbek.kz portaldary arqyly usynady. Olardyń qyzmetiniń shektelý faktisin quramyna Ulttyq kásipkerler palatasy men kásipodaqtardyń ókilderi kiretin aýdandyq jáne qalalyq shtabtar rastaıdy. Basqa sanattaǵy azamattar tólemderdi taǵaıyndaý úshin óz betinshe ótinish beredi. Ózin-ózi jumyspen qamtyǵan adamdarǵa birjolǵy tólemge ótinish berý úshin biryńǵaı jıyntyq tólemdi (BJT) qaıta tóleý mindetti emes. Ótinishter 2020 jylǵy 1 qyrkúıekke deıin qabyldanady, – dedi Ásıa Quralqyzy.
Aǵymdaǵy jyldyń shilde aıynda shekteý sharalarynyń engizilýine baılanysty tabysynan aıyrylǵan jaǵdaıda MÁSQ-tan birjolǵy tólem taǵaıyndaý týraly ótinimderdi kelesi portaldar arqyly berýge bolady: «Elektrondyq úkimet» veb-portaly; 42500.enbek.kz portal; telegram-bot-tar; Aitu messendjerindegi 42500.enbek.kz qosymshasy; ekinshi deńgeıdegi bankterdiń mobıldi qosymshalary men ınternet-resýrstary.
Budan bólek, Memleket basshysynyń tapsyrmasyna sáıkes, tótenshe jaǵdaıǵa baılanysty aǵymdaǵy jyldyń sáýir-mamyr aılarynda oblysta 5 áleýmettik topqa jatatyn azamattarǵa azyq-túlik-turmystyq jıyntyqtarmen qamtamasyz etý úshin ótemaqy retinde 5567 teńge berildi. Barlyǵy oblys boıynsha sáýir-mamyr aılarynda 160,6 myń adam 1,8 mlrd.teńgege azyq-túlik-turmystyq jıyntyǵymen qamtylǵan. Ol topqa jatatyndar: ataýly áleýmettik kómek alýshylar qataryndaǵy 6 jastan 18 jasqa deıingi balalar; medısınalyq-áleýmettik mekemelerde turaqty turatyn múgedekterdi qospaǵanda, 16 jasqa deıingi múgedek balalar; medısınalyq-áleýmettik mekemelerde turaqty turatyn múgedekterdi qospaǵanda, barlyq jastaǵy I, II, III toptaǵy múgedekter; múgedek bala tárbıelep otyrǵan adamdar; jumyspen qamtý máseleleri jónindegi jergilikti organda tirkelgen jumyssyzdar. Qosymsha aǵymdaǵy jyldyń 20 shildesinen bastap aıdyń sońyna deıin atalǵan sanattaǵy azamattarǵa azyq-túlik-turmystyq jıyntyǵy beriletin bolady.
Sondaı-aq, baspasóz máslıhatyna qatysqan QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń Túrkistan oblysy boıynsha departamenti basshysynyń orynbasary Marat Arharov shekteý sharalary kezindegi múgedektiktiń taǵaıyndalýy men tanylýy jaıyn sóz etti. Sonymen qatar, oblystyq eńbek ınspeksıasy jónindegi basqarma basshysynyń orynbasary Begman Nurmahanov shekteý is-sharalaryn engizýge baılanysty kirisinen aıyrylǵan adamdardyń tizimin jáne talaptarǵa sáıkes kelýin jumys berýshi aıqyndaıtynyn aıtty. Jumys berýshi Qaǵıda talaptaryn saqtamaǵan jaǵdaıda jumysshy eńbek ınspeksıasy jónindegi jergilikti organǵa aryzdanýǵa bolatynyn jetkizdi.
Túrkistan oblysynyń Óńirlik komýnıkasıalar qyzmeti
