2021 jyly 4 kópir kúrdeli jóndeýden ótkizilip, 3 kópir (Túlkibas, Otyrar, Báidibek aýdandary) paidalanýǵa berilse, Túlkibas aýdanyndaǵy 1 kópirdiń jóndeý jumystary biyl jalǵasyp jatyr.
Sondai-aq, qazirgi tańda oblystyq jolaýshylar kóligi jáne avtomobil joldary basqarmasy tarapynan 5 kópir aǵymdaǵy jóndeýden ótkizilýde. Atap aitqanda, Qazyǵurt aýdanyndaǵy oblystyq mańyzy bar «Qazyǵurt-Turbat» baǵytyndaǵy joldyń boiyndaǵy kópir, Sairam aýdanyndaǵy «Shymkent-Qutarys-Túietas» avtomobil joly boiyndaǵy 2 kópir, Túlkibas aýdanyndaǵy «Balyqty-Abai-Pisteli» avtomobil joly men Báidibek aýdanyndaǵy «Shaian-Aǵybet» avtomobil jolyndaǵy kópirlerge jóndeý jumystary júrgizilip jatyr.
Jyl saiyn basqarma tarapynan oblys aýmaǵyndaǵy kópirlerdiń jaǵdaiyna airyqsha kóńil bólinýde. Sonymen qatar biyl Túrkistan qalasy, Saýran, Jetisai, Saryaǵash, Otyrar, Tólebi, Ordabasy, Maqtaaral, Keles, Báidibek aýdandaryndaǵy oblystyq mańyzy bar joldardyń boiyndaǵy 16 kópirdi kúrdeli jóndeýden ótkizýge jobalaý-smetalyq qujattamasy ázirlenýde.
Onyń ishinde, 5 kópirge memlekettik saraptama qorytyndysy alynǵan bolsa, qalǵan kópirlerge jyl sońyna deiin saraptama qorytyndysyn alý josparlanǵan.
