QR Densaýlyq saqtaý ministrligi men Bilim ministrligi birlesip ǵylymi derekter, halyqaralyq usynymdar negizinde mektepte tamaqtanýdyń jańa standartyn ázirledi. Atalǵan standart – balalardyń durys jáne utymdy tamaqtanýyn qamtamasyz etýge baǵyttalǵan. Bul týraly brifingte Túrkistan oblysynyń sanitariialyq-epidemiologiialyq baqylaý departamentiniń basshysy Nurbek Nyshanov málimdedi
– Elimizdegi mektepterdiń as mázirinen quramynda qanty bar sýsyndar men shyryndar, shujyq ónimderi, ystalǵan et, spred-mai jáne dám men iis kúsheitkishteri bar ónimder alynyp tastaldy. Esesine balalardyń fiziologiialyq qajettilikterin eskere otyryp, jańa pisken kókónister men jemisterdiń úlesi arttyrylyp, olardyń ratsiondaǵy orny kúsheitildi.
Bul standarttar balalar arasynda semizdik, qant diabeti, júrek-qan tamyrlary jáne basqa aýrýlardyń damý qaýpin tómendetýdi kózdeidi. Sonymen qatar, as blogy joq shaǵyn jinaqtalǵan mektepter men býfeti joq bilim berý uiymdarynda «Lanch-paketter» boiynsha tamaqtanýdy uiymdastyrý modeli qoldanylady. «Lanch-paketterde» – et jáne irimshik qosylǵan ystyq býterbrodtar usynylady. Oǵan qosa, ashytylǵan sút ónimi, maýsymdyq jemister men sýsyndar beriledi.
Eń bastysy, ystyq tamaqty daiyndaýda negizi 3 tásilge nazar aýdarylǵan. Olar – qainatý, býmen pisirý, buqtyrý. Sondai-aq, alǵash ret mektep taǵamdaryna oqýshylardyń qanaǵattaný deńgeiin baǵalaý úshin «Jeýge jaramsyzdyq indeksi» uǵymy engizilgen.
Osy standartta tiimdi tamaqtaný qaǵidattaryn engizýdi jáne saqtaýdy bilim berý uiymdarynyń meditsina qyzmetkeri júzege asyrady jáne olar tamaqtaný máseleleri boiynsha 5 jylda bir ret biliktilikti arttyrýdan ótýi qajet. Budan bólek, mektep ashanalarynda «Áleýmettik ámiian» aqparattyq júiesimen integratsiialaý jumystary josparlanýda. Onda ata-analar berilgen taǵamnyń sapasyna keri bailanys jasap, baǵa bere alatyn bolady. Osylaisha, jańa standart elimizdiń barlyq bilim berý uiymdarynda 2025 jyldyń 1 qyrkúieginen bastap tolyq qoldanysqa engiziledi, – dedi sala basshysy.
Túrkistan oblysynyń Óńirlik kommýnikatsiialar qyzmeti
