Túrkistan oblysynda aýyl sharýashylyǵy maqsatyndaǵy jerlerge júrgizilgen túgendeý jumystary barysynda 43,8 myń gektar jerdiń paıdalanylmaı jatqandyǵy anyqtaldy. Bul týraly brıfıńte 9 aıda atqarǵan jumysyn qorytyndylaǵan Oblystyq jer qatynastary basqarmasy basshysynyń mindetin atqarýshy Erǵalı Tilegen málimdedi, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Qazirgi tańda, onyń 17,9 myń gektaryn jer ıeleri óz erikterimen memleket menshigine qaıtarsa, 18,8 myń gektaryn qaıta ıgerýge kirisken, al 8,8 myń gektar jer aýdan, qala ákimdikteri tarapynan memleket menshigine qaıtarý sharalary júrgizilýde.

– Bıyl aýyl sharýashylyǵy maqsatyndaǵy 145,5 myń gektar jerdi aınalymǵa qosý josparlanǵan. Nátıjesinde konkýrs arqyly jalpy aýmaǵy 147,1 myń gektar 867 jer telimi aınalymǵa engizildi. Oblys ákiminiń tapsyrmasymen jaıylym jerlerdi qaıtarýdyń 5 baǵyttyq algorıtmi ázirlengen. Nátıjesinde birinshi kezekte jaıylym tapshylyǵy oryn alǵan 152 eldi meken mańyndaǵy jekeshelendirilip ketken 129,6 myń gektar jaıylymdyq jer anyqtaldy. Búginge deıin onyń 117,6 myń gektary aýyl ákimshilikteriniń teńgerimine berildi. Jyl sońyna deıin bekitilgen jospar tolyǵymen oryndalady, – dedi Erǵalı Amangeldiuly.