Túrkistan oblysy ákiminiń orynbasary jańa joba 3 baǵytty qamtitynyn aitty.
Brifingte baiandama jasaǵan basqarma basshysy Ásiia Temirbaeva AÁK alatyn jumyssyz azamattarǵa baǵdarlamaǵa sáikes jumys usynylatynyn jáne odan bas tartqan jandarǵa áleýmettik kómek berilmeitinin aitty.
– Kópbalaly jáne tabysy az otbasylar úshin olardyń kásipkerlik belsendiligin yntalandyrý maqsatynda mikrokredit berý sharttary jeńildetildi. Olarǵa mikrokreditter jyldyq 4 paiyzdan aspaityn paiyzdyq mólsherlememen 7 jylǵa deiingi merzimge jeńildikti sharttarmen beriletin bolady. Budan basqa, halyqtyń barlyq sanattary úshin memlekettik granttardyń biryńǵai mólsheri – 200 AEK (530,2 myń teńge) belgilengen. Bul rette kópbalaly jáne tabysy az otbasy músheleriniń aldyn ala oqýsyz grant alýǵa quqyǵy bar, – dedi Á.Temirbaeva.
Sondai-aq, baspasóz máslihatyna qatysqan Saǵira Aitanaeva járdemaqyny tóleý otbasynyń tabysyna táýeldi bolmaitynyn jetkizdi. Iaǵni, járdemaqy barlyq kópbalaly, kámelettik jasqa tolmaǵan balalary bar otbasylarǵa tólenbek. Tólemniń mólsheri otbasyndaǵy bala sanyna bailanysty eseptelmek.
– Járdemaqy – balalary 18 jasqa tolmaǵan kópbalaly otbasylarǵa tabysyna qaramastan 42500 teńgeden 73375 teńgege deiin beriledi. Máselen, 4 balaly otbasy – 42496 teńge, 5 balaly otbasyǵa – 53127 teńge, 6 balaly januiaǵa – 63757 teńge, 7 balaly otbasy úshin – 74388 teńge taǵaiyndalady. Sondai-aq, 18 jastan asqan balalary orta jáne joǵarǵy bilim oqý oryndarynda oqyǵan jaǵdaida, ol otbasylarǵa atalǵan memlekettik járdemaqy balasy 23 jasqa tolǵanǵa deiin tólenedi, – dedi S.Aitanaeva.
Aita keteiik, járdemaqy Túrkistan oblysy boiynsha qańtar aiynda 88 myńǵa jýyq otbasyn qamtidy, iaǵni qańtar aiynda tolyq tólenedi. Al, aqpan aiynda 92 myńnan astam otbasy atalǵan járdemaqyny alatyn bolady. Ótken jyly ataýly áleýmettik kómek 110 myń otbasyǵa, iaǵni 632,8 myń turǵynǵa berilgen bolatyn.
Túrkistan oblysynyń óńirlik kommýnikatsiialar qyzmeti
