Túrkistan oblysy ákiminiń orynbasary jańa joba 3 baǵytty qamtıtynyn aıtty.
– Birinshi baǵyt boıynsha, kópbalaly otbasylar jeke sanatqa shyǵarylyp, olarǵa kepildendirilgen járdemaqy usynylady. Bul rette kópbalaly otbasy – az qamtylǵan otbasy degen stereotıpten alynyp tastalynady. Ekinshi baǵytta, az qamtylǵan sanattaǵy azamattardy qoldaý jáne olardy eńbekke yntalandyrý kózdelgen. Úshinshi baǵytta, barlyq AÁK alýshy otbasylardaǵy balalarǵa zattaı qoldaýdy qamtıtyn kepildendirilgen paketti usyný kózdelgen, – dedi U.Tájibaev.
Brıfıńte baıandama jasaǵan basqarma basshysy Ásıa Temirbaeva AÁK alatyn jumyssyz azamattarǵa baǵdarlamaǵa sáıkes jumys usynylatynyn jáne odan bas tartqan jandarǵa áleýmettik kómek berilmeıtinin aıtty.
– Kópbalaly jáne tabysy az otbasylar úshin olardyń kásipkerlik belsendiligin yntalandyrý maqsatynda mıkrokredıt berý sharttary jeńildetildi. Olarǵa mıkrokredıtter jyldyq 4 paıyzdan aspaıtyn paıyzdyq mólsherlememen 7 jylǵa deıingi merzimge jeńildikti sharttarmen beriletin bolady. Budan basqa, halyqtyń barlyq sanattary úshin memlekettik granttardyń biryńǵaı mólsheri – 200 AEK (530,2 myń teńge) belgilengen. Bul rette kópbalaly jáne tabysy az otbasy músheleriniń aldyn ala oqýsyz grant alýǵa quqyǵy bar, – dedi Á.Temirbaeva.
Sondaı-aq, baspasóz máslıhatyna qatysqan Saǵıra Aıtanaeva járdemaqyny tóleý otbasynyń tabysyna táýeldi bolmaıtynyn jetkizdi. Iaǵnı, járdemaqy barlyq kópbalaly, kámelettik jasqa tolmaǵan balalary bar otbasylarǵa tólenbek. Tólemniń mólsheri otbasyndaǵy bala sanyna baılanysty eseptelmek.
– Járdemaqy – balalary 18 jasqa tolmaǵan kópbalaly otbasylarǵa tabysyna qaramastan 42500 teńgeden 73375 teńgege deıin beriledi. Máselen, 4 balaly otbasy – 42496 teńge, 5 balaly otbasyǵa – 53127 teńge, 6 balaly januıaǵa – 63757 teńge, 7 balaly otbasy úshin – 74388 teńge taǵaıyndalady. Sondaı-aq, 18 jastan asqan balalary orta jáne joǵarǵy bilim oqý oryndarynda oqyǵan jaǵdaıda, ol otbasylarǵa atalǵan memlekettik járdemaqy balasy 23 jasqa tolǵanǵa deıin tólenedi, – dedi S.Aıtanaeva.
Sonymen qatar, jańa jobaǵa sáıkes az qamtamasyz etilgen otbasylar úshin qosymsha áleýmettik kepildendirilgen paket endirilgen. Iaǵnı, mektep jasyna deıingi balalar tamaqpen, gıgıenalyq quraldarmen, mektep jasyndaǵy balalar ystyq tamaqpen, mektep qural-jabdyqtar jáne kıim-keshekpen qamtylyp, jol aqysyn óteletin bolady.
Aıta keteıik, járdemaqy Túrkistan oblysy boıynsha qańtar aıynda 88 myńǵa jýyq otbasyn qamtıdy, ıaǵnı qańtar aıynda tolyq tólenedi. Al, aqpan aıynda 92 myńnan astam otbasy atalǵan járdemaqyny alatyn bolady. Ótken jyly ataýly áleýmettik kómek 110 myń otbasyǵa, ıaǵnı 632,8 myń turǵynǵa berilgen bolatyn.
Túrkistan oblysynyń óńirlik komýnıkasıalar qyzmeti
