تۇركىستان وبلىسى اكىمىنىڭ ورىنباسارى جاڭا جوبا 3 باعىتتى قامتيتىنىن ايتتى.
– ءبىرىنشى باعىت بويىنشا، كوپبالالى وتباسىلار جەكە ساناتقا شىعارىلىپ، ولارعا كەپىلدەندىرىلگەن جاردەماقى ۇسىنىلادى. بۇل رەتتە كوپبالالى وتباسى – از قامتىلعان وتباسى دەگەن ستەرەوتيپتەن الىنىپ تاستالىنادى. ەكىنشى باعىتتا، از قامتىلعان ساناتتاعى ازاماتتاردى قولداۋ جانە ولاردى ەڭبەككە ىنتالاندىرۋ كوزدەلگەن. ءۇشىنشى باعىتتا، بارلىق ااك الۋشى وتباسىلارداعى بالالارعا زاتتاي قولداۋدى قامتيتىن كەپىلدەندىرىلگەن پاكەتتى ۇسىنۋ كوزدەلگەن، – دەدى ۇ.تاجىبايەۆ.
بريفينگتە بايانداما جاساعان باسقارما باسشىسى ءاسيا تەمىربايەۆا ااك الاتىن جۇمىسسىز ازاماتتارعا باعدارلاماعا سايكەس جۇمىس ۇسىنىلاتىنىن جانە ودان باس تارتقان جاندارعا الەۋمەتتىك كومەك بەرىلمەيتىنىن ايتتى.
– كوپبالالى جانە تابىسى از وتباسىلار ءۇشىن ولاردىڭ كاسىپكەرلىك بەلسەندىلىگىن ىنتالاندىرۋ ماقساتىندا ميكروكرەديت بەرۋ شارتتارى جەڭىلدەتىلدى. ولارعا ميكروكرەديتتەر جىلدىق 4 پايىزدان اسپايتىن پايىزدىق مولشەرلەمەمەن 7 جىلعا دەيىنگى مەرزىمگە جەڭىلدىكتى شارتتارمەن بەرىلەتىن بولادى. بۇدان باسقا، حالىقتىڭ بارلىق ساناتتارى ءۇشىن مەملەكەتتىك گرانتتاردىڭ ءبىرىڭعاي مولشەرى – 200 اەك (530،2 مىڭ تەڭگە) بەلگىلەنگەن. بۇل رەتتە كوپبالالى جانە تابىسى از وتباسى مۇشەلەرىنىڭ الدىن الا وقۋسىز گرانت الۋعا قۇقىعى بار، – دەدى ءا.تەمىربايەۆا.
سونداي-اق، باسپا ءسوز ءماسليحاتىنا قاتىسقان ساعيرا ايتانايەۆا جاردەماقىنى تولەۋ وتباسىنىڭ تابىسىنا تاۋەلدى بولمايتىنىن جەتكىزدى. ياعني، جاردەماقى بارلىق كوپبالالى، كامەلەتتىك جاسقا تولماعان بالالارى بار وتباسىلارعا تولەنبەك. تولەمنىڭ مولشەرى وتباسىنداعى بالا سانىنا بايلانىستى ەسەپتەلمەك.
– جاردەماقى – بالالارى 18 جاسقا تولماعان كوپبالالى وتباسىلارعا تابىسىنا قاراماستان 42500 تەڭگەدەن 73375 تەڭگەگە دەيىن بەرىلەدى. ماسەلەن، 4 بالالى وتباسى – 42496 تەڭگە، 5 بالالى وتباسىعا – 53127 تەڭگە، 6 بالالى جانۇياعا – 63757 تەڭگە، 7 بالالى وتباسى ءۇشىن – 74388 تەڭگە تاعايىندالادى. سونداي-اق، 18 جاستان اسقان بالالارى ورتا جانە جوعارعى ءبىلىم وقۋ ورىندارىندا وقىعان جاعدايدا، ول وتباسىلارعا اتالعان مەملەكەتتىك جاردەماقى بالاسى 23 جاسقا تولعانعا دەيىن تولەنەدى، – دەدى س.ايتانايەۆا.
سونىمەن قاتار، جاڭا جوباعا سايكەس از قامتاماسىز ەتىلگەن وتباسىلار ءۇشىن قوسىمشا الەۋمەتتىك كەپىلدەندىرىلگەن پاكەت ەندىرىلگەن. ياعني، مەكتەپ جاسىنا دەيىنگى بالالار تاماقپەن، گيگيەنالىق قۇرالدارمەن، مەكتەپ جاسىنداعى بالالار ىستىق تاماقپەن، مەكتەپ قۇرال-جابدىقتار جانە كيىم-كەشەكپەن قامتىلىپ، جول اقىسىن وتەلەتىن بولادى.
ايتا كەتەيىك، جاردەماقى تۇركىستان وبلىسى بويىنشا قاڭتار ايىندا 88 مىڭعا جۋىق وتباسىن قامتيدى، ياعني قاڭتار ايىندا تولىق تولەنەدى. ال، اقپان ايىندا 92 مىڭنان استام وتباسى اتالعان جاردەماقىنى الاتىن بولادى. وتكەن جىلى اتاۋلى الەۋمەتتىك كومەك 110 مىڭ وتباسىعا، ياعني 632،8 مىڭ تۇرعىنعا بەرىلگەن بولاتىن.
تۇركىستان وبلىسىنىڭ وڭىرلىك كوممۋنيكاسيالار قىزمەتى
