Arada nebári bir jyl ótse de óńir qarqyndy damýdyń jolyna túsip, oblys ortalyǵy bolǵan Túrkistan qalasy jańa keiipke enip keledi. Máselen, óńirdiń áleýmettik-ekonomikalyq damýy úshin osy bir aidyń kóleminde Úkimet tarapynan asa mańyzdy 5 qaýly qabyldandy. Onyń eń mańyzdysy – «Túrkistan oblysyn áleýmettik-ekonomikalyq damytýdyń 2024 jylǵa deiingi keshendi jospary».
Sondai-aq, meditsina salasynda oblystyq biýdjet esebinen 2018 jyly shalǵai eldi mekenderge 62 modýldik meditsinalyq pýnkt satyp alyndy, 2019 jyly 19 modýldik meditsinalyq pýnkt ornatý josparlandy. Oblysta 2 qalalyq, 4 aýdandyq emhananyń qurylysy jáne Túrkistan qalasynda №3 oblystyq perinataldyq ortalyǵyna japsarlas 150 oryndyq perzenthanasy jáne 900 oryndyq 1 bilim uiasynyń qurylysy júrýde.
Biyl memlekettik jáne salalyq baǵdarlamalar aiasynda 3315 jańa jumys oryndary ashyldy. Bul óz kezeginde jumyssyzdyq deńgeiiniń tómendeýine aitarlyqtai áser etti. Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy sheńberinde 24 478 adam jumyspen qamtý sharalaryna qatysty.
Oblys turǵyndarynyń ómir sapasyn arttyrý maqsatynda injenerlik infraqurylym, sonyń ishinde jylý, sý tartý júiesi, gaz jáne elektrmen jabdyqtaý boiynsha kóptegen máseleler sheshimin tapty.
Baspasóz-konferentsiiasynda Túrkistan oblysynyń ákimi Ómirzaq Shókeev oblys ortalyǵyn damytý josparymen tanystyrdy.
– Túrkistan qalasyndaǵy ekologiialyq jaǵdaidy jaqsartý úshin aǵymdaǵy jyldyń sońyna qarai halyqtyń 56% gazben qamtamasyz etý josparda bar. Sonymen qatar, Túrkistan qalasyn 83%-ǵa aýyz sýmen qamtamasyz etýge baǵyttalǵan jumystar bastaldy. Búgingi tańda qurylysy qarqyndy júrip jatqan Túrkistanda 29 nysan boi kóteredi. Onyń ishinde jańa ákimshilik-iskerlik ortalyǵynda 17 nysannyń qurylysy bastaldy. Biyl 7 nysan paidalanýǵa beriledi. Atap aitsaq, oblys ákimdigi, Astana alańy, Media ortalyq, Olimpiadalyq rezervtegi sport mektebi, saiabaq, mýzykalyq mektep, halyqqa qyzmet kórsetý ortalyǵy, – dedi Ómirzaq Estaiuly.
Aýa-raiynyń qolailylyǵy, halyqtyń eńbekqorlyǵy – óńirdiń investitsiialyq qabilettiligin kórsetetin basty ólshemniń biri. Biylǵy jyldyń alǵashqy bes aiynda investitsiia kólemi 60 mlrd. teńgeden asty.
Túrkistannyń áleýmettik-ekonomikalyq damýymen qatar, Túrkistan qalasynyń ideologiialyq negizdemesin qalyptastyrý boiynsha 4 baǵyt aiqyndalǵan bolatyn. Birinshiden, Túrkistan – qazaq halqy men túrki tildes elderdiń eń iri ziiarat jáne týrizm ortalyǵy. Ekinshi, Túrkistan – álemdik deńgeidegi qolóner jáne sheberler ortalyǵy. Úshinshi, Túrkistan – Uly Jibek jolynyń boiynda ornalasqan iri saýda ortalyǵy. Tórtinshi, Qoja Ahmet Iasaýi – rýhani tulǵa. Mine, osy 4 baǵyt boiynsha ideologiialyq jumystar qolǵa alynady. Onyń birqatary Túrkistan oblysynyń 1 jyldyǵy aiasynda bastalyp ta ketti.
Az ǵana ýaqyt ishinde oblys jetken jetistikter az emes. Ary qarai da el igiligi úshin atqarylatyn sharýa shash-etekten. Bul jumystar aldaǵy ýaqytta da óz jalǵasyn tabatyn bolady.
Túrkistan oblysy ákiminiń baspasóz qyzmeti
