Túrkistan oblysynda bıyl Naýryz meıramyn 10 kún boıy atap ótý josparlanyp otyr. Bul halqymyzdyń ejelden kele jatqan ata dástúri. 14-23 naýryz kúnderi arylyǵynda «Kórisý kúni – amal merekesi», «Meıirimdilik merekesi» syndy ataýly kúnderi túrli sharalar ótedi. Bul týraly brıfıńte Túrkistan oblysy mádenıet jáne týrızm basqarmasynyń basshysy Ázimhan Qoılybaev málimdedi.
«14 naýryz - «Kórisý kúni – amal merekesi» kúni óńirdegi belgili óner, sport salasyndaǵy qaıratkerler aǵa býynnyń shańyraqtaryna arnaıy baryp, jyldyń bastalýymen quttyqtaıdy. Amandandyq surasyp, kórisedi. Sondaı-aq, osy kúni «Naýryz – jaqsylyqtyń jarshysy» ataýymen oblystyq chellenj uıymdastyrylady.
Al 15 naýryz kúni «Naýryz - meıirimdilik merekesi» retinde atalyp ótpek. Bul kúni aýdan-qalalarda, aýyldarda jaǵdaıy tómen otbasylarǵa, múmkindigi shekteýli azamattarǵa kómek kórsetý maqsatynda qaıyrymdylyq aksıasy ótedi. Sondaı-aq, soǵys, eńbek ardagerlerine, Batyr analarǵa qurmet kórsetý maqsatynda «Aǵa urpaqty qasterleıik» aksıasy qolǵa alynady» - dedi basqarma basshysy.
Sonymen qatar, 15 naýryz kúni - Túrkistan qalasyndaǵy «Kongres hol» kesheninde oblys ákimdigi men aıtys aqyndary jáne jyrshy-termeshilerdiń Halyqaralyq odaǵynyń uıymdastyrýymen Túrkistan oblysy men Jambyl oblysy aqyndary, termeshi-jyrshylary arasyndaǵy komandalyq óner dodasy uıymdastyrylady. Bul jaıynda brıfıńte «Aıtys aqyndary men jyrshy-termeshilerdiń Halyqaralyq Odaǵynyń» Túrkistan oblysyndaǵy fılıal tóraǵasy Turar Tileýlıev aıtty.
«16 naýryz kúni «Naýryz – salt-dástúrdiń jańǵyrýy» degen bastamamen oblystaǵy barlyq mádenıet mekemelerinde ulttyq salt-dástúrlerdi jańǵyrtatyn sahnalyq kórinister ótedi. Al 17 naýryz kúni «Naýryz - tárbıeniń bastaýy» degen ataýmen barlyq mektepterde merekelik is-sharalar, qolóner sheberleri men sýretshilerdiń kórmeleri uıymdastyrylady.
Sondaı-aq, jaǵdaıy tómen otbasylardyń balalaryna, múmkindigi shekteýli balalarǵa kómek kórsetilmek. 18 naýryz - «Túrkistan – Túrki áleminiń týrısik astanasy» degen atpen 09:00-den bastap Túrkistan oblysynyń memlekettik qyzmetshileri ulttyq kıim kıý chellenjin bastaıdy. Sonymen qatar, 18 naýryz kúni «Túrkistan – túrki áleminiń týrısik astanasy» atanýynyń resmı ashylý saltanaty «Kerýen saraı» aýmaǵynda ótedi», - dedi Ázimhan Serikuly.
Brıfıńke qatysqan Túrkistan oblysy mádenıet jáne halyq shyǵarmashylyǵy ortalyǵynyń dırektory Meıirjan Alıakbarov 19 naýryz kúni - «Naýryz - jańarý men jańǵyrýdyń, tatýlyqtyń bastaýy» degen atpen barlyq óńirlerde aǵash egý dástúri qolǵa alynatynyn aıtty. Bul kúngi merekelik is-sharalar «Naýryz bata» dástúrimen qorytyndylanady. 
«20 naýryz - «Ulttyq sportty ulyqtaý» kúninde barlyq óńirlerdegi sport keshenderi men atshabarlarda ulttyq sport túrlerinen jarystar ótedi. Al 21 naýryz «Qosh keldiń – Áz Naýryz!» degen ataýmen Túrkistan qalasyndaǵy «Kerýen» saraıy aýmaǵynda oblys ákiminiń qatysýymen merekelik saltanatty is-shara josparlanyp otyr. 22 naýryz «Ulystyń uly kúni - Áz Naýryz» kúni Túrkistan qalasy men barlyq aýdan-qalalardaǵy ortalyq alańdar men saıabaqtarda kórmeler, konserttik baǵdarlamalar, ulttyq sporttyq oıyndar mereke kórkin qyzdyrady.
Al 23 naýryz «Naýryz – tazalyqtyń aınasy» kúni oblys kóleminde jalpy halyqtyq senbilik uıymdastyrylyp, aýdandar men qalalarda tazalyq jumystary júrgiziledi», - dedi Meıirjan Nurǵalıuly.
