Túrkistan oblysynda jalpy 362 287 zeınetker bar. Onyń ishinde: 186 489 azamat jasyna baılanysty zeınetaqy alýshy bolsa, 175 198-i bazalyq zeınetaqy alýshy. Sonymen qatar, óńirdiń 346 238 azamaty járdemaqy alýshylar qatarynda. Bul jaıynda Halyqty áleýmettik qorǵaý salasyndaǵy retteý jáne baqylaý komıtetiniń Túrkistan oblysy boıynsha departament basshysy Begman Nurmahanov brıfıńte málimdedi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
– Túrkistan oblysy elimizde kópbalaly otbasylar kóptiginen kósh bastap tur. Búgingi tańda óńirde 120 549 kópbalaly otbasy járdemaqy alady. Sondaı-aq, 64 354 kópbalaly anaǵa departament járdemaqy belgilegen. Budan bólek, 75 262 oblys turǵyny múgedektigi boıynsha járdemaqy alsa, 21 839 azamat asyraýshysynan aırylý sebebinen memlekettik járdemaqy alady, – dedi spıker.
Sonymen qatar, departament basshysy medısınalyq-áleýmettik saraptama júrgizý jumystaryna toqtaldy. Statısıkalyq málimetterge sáıkes, 2024 jyldyń 1 qazan aıyndaǵy kórsetkish boıynsha oblysta múgedektigi bar adamdardyń sany 100 029-ǵa jetip, respýblıkadaǵy jalpy múgedekter sanynyń 13,7%-n qurady. Múgedektigi bar adamdardyń 15 189-y kámelet jasyna tolmaǵandar bolsa, qalǵan 84 840-i 18 jastan asqan oblys turǵyndary.
Jyl basynan beri departament tarapynan múgedektigi bar adamdardy áleýmettik qorǵaý salasyndaǵy memlekettik baqylaýdy júzege asyrý boıynsha barlyǵy 196 tekserý jumystary júrgizilgen. Tekserý qorytyndysymen 51 nusqama berilip, jalpy 160 nysanǵa 34 mln. 187 myń teńge kóleminde ákimshilik aıyppul salynǵan. Onyń 33 mln. 228 myń teńgesi óndirilgen.
