تۇركىستان وبلىسىندا جالپى 362 287 زەينەتكەر بار. ونىڭ ىشىندە: 186 489 ازامات جاسىنا بايلانىستى زەينەتاقى الۋشى بولسا، 175 198ء-ى بازالىق زەينەتاقى الۋشى. سونىمەن قاتار، ءوڭىردىڭ 346 238 ازاماتى جاردەماقى الۋشىلار قاتارىندا. بۇل جايىندا حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ تۇركىستان وبلىسى بويىنشا دەپارتامەنت باسشىسى بەگمان نۇرماحانوۆ بريفينگتە مالىمدەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

– تۇركىستان وبلىسى ەلىمىزدە كوپبالالى وتباسىلار كوپتىگىنەن كوش باستاپ تۇر. بۇگىنگى تاڭدا وڭىردە 120 549 كوپبالالى وتباسى جاردەماقى الادى. سونداي-اق، 64 354 كوپبالالى اناعا دەپارتامەنت جاردەماقى بەلگىلەگەن. بۇدان بولەك، 75 262 وبلىس تۇرعىنى مۇگەدەكتىگى بويىنشا جاردەماقى السا، 21 839 ازامات اسىراۋشىسىنان ايرىلۋ سەبەبىنەن مەملەكەتتىك جاردەماقى الادى، – دەدى سپيكەر.

سونىمەن قاتار، دەپارتامەنت باسشىسى مەديسينالىق-الەۋمەتتىك ساراپتاما جۇرگىزۋ جۇمىستارىنا توقتالدى. ستاتيستيكالىق مالىمەتتەرگە سايكەس، 2024 جىلدىڭ 1 قازان ايىنداعى كورسەتكىش بويىنشا وبلىستا مۇگەدەكتىگى بار ادامداردىڭ سانى 100 029-عا جەتىپ، رەسپۋبليكاداعى جالپى مۇگەدەكتەر سانىنىڭ 13،7%-ن قۇرادى. مۇگەدەكتىگى بار ادامداردىڭ 15 189-ى كامەلەت جاسىنا تولماعاندار بولسا، قالعان 84 840ء-ى 18 جاستان اسقان وبلىس تۇرعىندارى.

جىل باسىنان بەرى دەپارتامەنت تاراپىنان مۇگەدەكتىگى بار ادامداردى الەۋمەتتىك قورعاۋ سالاسىنداعى مەملەكەتتىك باقىلاۋدى جۇزەگە اسىرۋ بويىنشا بارلىعى 196 تەكسەرۋ جۇمىستارى جۇرگىزىلگەن. تەكسەرۋ قورىتىندىسىمەن 51 نۇسقاما بەرىلىپ، جالپى 160 نىسانعا 34 ملن. 187 مىڭ تەڭگە كولەمىندە اكىمشىلىك ايىپپۇل سالىنعان. ونىڭ 33 ملن. 228 مىڭ تەڭگەسى وندىرىلگەن.