Elimizde jyl saiyn qazan aiynyń ekinshi jeksenbisi múgedektigi bar adamdar kúni retinde belgilengen. Osyǵan orai Túrkistan qalasynda áleýmettik qorǵaý salasy boiynsha májilis ótti. Respýblika kúni qarsańyndaǵy mańyzdy jiynǵa oblys ákiminiń orynbasary Beisenbai Tájibaev arnaiy qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Májiliske salaǵa jaýapty departamentter men basqarma basshylary, jumyspen qamtý jáne áleýmettik baǵdarlamalar bólimderiniń jetekshileri, múgedekter isi jónindegi oblys, aýdan jáne qala ákimderiniń shtattan tys keńesshileri, múgedektigi bar adamdardyń qoǵamdyq birlestikteri tóraǵalary shaqyryldy.
– Aldymen barshańyzdy kele jatqan Respýblika kúnimen quttyqtaimyn. Elimiz aman bolsyn! Múgedektigi bar jandar – qaisarlyqtyń úlgisi. Olardyń ómirge degen talpynysy, tabandylyǵy, qushtarlyǵy, qiyndyqtardy eńserýi júregimizge senim uialatady. Eshbir synaq adam boiyndaǵy kúsh-jigerdi jeńe almaidy. Biz barlyǵymyz bir qoǵamnyń múshesimiz jáne árqaisymyzdyń quqyǵymyz teń. Inkliýzivti qoǵam qurý jáne qoldaý kórsetý mańyzdy. Sebebi olardyń arasynda bilimdi azamattar, tabysty kásipkerler, shyǵarmashylyqqa jaqyn óner ieleri, sportshylar, innovatsiialyq jobalardyń avtorlary, qoǵam qairatkerleri, túrli salada jetistikke jetken tulǵalar bar. Búginde memlekettik baǵdarlamalar iske asyrylýda.
Túrkistan óńirinde múgedektigi bar azamattardyń quqyqtaryn qorǵaý jáne áleýmettik jaǵdaiyn jaqsartýda tiisti sharalar uiymdastyrylyp keledi. Bilim berý, jumyspen qamtý, densaýlyq saqtaý, áleýmettik kómek, ońaltý qyzmetteri, saiasi jáne qoǵamdyq ómirge qatysýyna múmkindikter qarastyrylǵan. Sizderdi mańyzy erekshe kúnmen quttyqtaimyn! Búgin júrgizilip jatqan jumystar men josparlardy saralaýǵa jinaldyq. Suraqtaryńyzǵa qulaq túrip, usynystardy birge talqylaiyq – dedi Beisenbai Dáýletuly.
Oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Nurjan Nurashov atalǵan baǵytta atqarylyp jatqan jumystardy baiandady. Túrkistan óńirinde 100 myńǵa jýyq múgedektigi bar turǵyn bolsa, onyń 15 myńdaiy – 18 jasqa deiingi balalar. Oblys kóleminde áleýmettik qyzmetter portaly máseleleri jónindegi komissiiasy ońaltýdyń tehnikalyq quraldaryn tirkeý boiynsha 22 myńnan astam ótinishti qarap, 49% ótinish portalǵa tirkeýge jiberilgen.
Qazirgi tańda 80 paiyzǵa jýyǵy qamtamasyz etildi. Onyń ishinde sanatoriilik-kýrorttyq emdeý qyzmetine 12 myńǵa jýyq adam qol jetkizdi. Jańa biznes-ideialardy qoldaý maqsatynda 300-den asa múgedektigi bar adamǵa qaitarymsyz grant berildi. Erekshe fizikalyq qajettilikteri bar adamdarǵa arnalǵan 50 áleýmettik taksi qyzmet kórsetýde. Invataksiler júrip-turýy qiyn, tirek-qimyl apparaty buzylǵan azamattardy tasylmaldaý úshin olardyń minip-túsýine arnalǵan arnaiy qurylǵylarmen jabdyqtalǵan.
«Amanat» partiiasynyń 2023-2027 jyldarǵa arnalǵan «HALYQPEN BIRGE!» sailaýaldy baǵdarlamasyn oryndaý boiynsha jol kartasyna sáikes 2021-2024 jyldar aralyǵynda 1426 nysan beiimdeýden ótti. Sonymen qatar partiianyń «Kedergisiz keleshek» jobasy aiasynda balalarǵa arnalǵan «Teń múmkindikter» atty inkliýziialyq sport festivali uiymdastyryldy. Jumysqa ornalastyrýdan bastap, quqyqtyq, qarjylyq, psihologiialyq taǵy da basqa keńes berý maqsatynda «TEN QOGAM» ortalyqtary oblysymyzdyń 15 aýdan, qalasynda ashylyp azamattarǵa qyzmetter usynýda.
Ortalyqta túrli treningter, seminarlar, ekskýrsiialar uiymdastyrylady. Jýyrda Saýran aýdany, Oranǵai aýyldyq okrýginde 200 oryndyq «Samǵaý» ońaltý ortalyǵynyń ashylýy josparlanýda. Suraq-jaýap bóliminde múgedekter arbasymen qamtý, invataksidi kóbeitý, qoljetimdi orta qurýǵa nazar aýdarý jaiyn qozǵady.
Jiyn marapattaýmen qorytyndylandy. Respýblika kúni qarsańynda qoǵamdyq jumystarǵa belsene aralasyp júrgen 20-ǵa jýyq azamat oblys ákimininiń gramotasy, «Amanat» partiiasynyń Alǵys haty, oblys máslihatynyń gramotasyna ie boldy. Qoǵamdyq birlestikter men qaiyrymdylyq qor tóraǵalary Dúisenáli Júsipov, Shaltan Erkinbai, Dastan Orynbasarov «Oblysqa sińirgen eńbegi úshin» tósbelgisimen marapattaldy.
