Túrkistan qalasynda «Turkistan Marathon – 2024» marafony ótti. Ony Túrkistan oblysy ákimdigi men Túrkistan qalasy ákimdiginiń qoldaýymen «Birinshi bolý – batyldyq» korporativtik qory uiymdastyrdy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jarys Visit Turkistan aýmaǵynda ótti. Oǵan 40-tan asa elden kelgen 3000 áýesqoi sportshy qatysyp, Túrkistannyń kórikti jerlerin aralap, Bekzat Sattarhanov dańǵylymen áýejaiǵa qarai júgirip ótip, márege qaita oraldy.
Jarys sóresinde barlyq qatysýshyny Túrkistan oblysy ákiminiń orynbasary Ertai Altaev quttyqtap, marafonǵa qatysýshylarǵa sáttilik tiledi.
– Búgin biz qalamyzdyń jáne elimizdiń ómirindegi mańyzdy jáne aitýly oqiǵanyń biri – Túrkistan marafonynda jolyǵyp turmyz. Bul sporttyq mereke ǵana emes, erik-jigerdiń, batyldyqtyń merekesi. Túrkistan qalasynda osyndai aýqymdy is-sharanyń ótip jatqanyna qýanyshtymyn. Marafon arqyly buqaralyq sport, salamatty ómir salty nasihattalady. Mundai sharalar elimizde buqaralyq sporttyń damýyna zor septigin tigizedi dep senemin. Qoǵamda salaýatty urpaq qalyptastyrýǵa úles qosady. Sonymen birge Túrkistannyń týristik jáne sporttyq áleýeti tanystyrylady. Sondyqtan marafondar barlyq aýdan, qalada turaqty ótýi tiis. Túrkistan tórindegi marafon halyqaralyq deńgeide tanylyp, shetelden de qatysýshylar sany kóbeiedi degen oidamyn. Bul marafon sizderge tek jaǵymdy emotsiialar syilap, sporttaǵy jáne ómirdegi jańa jetistikterge bastama bola bersin! – dedi oblys ákiminiń orynbasary Ertai Kenjebekuly.
«Turkistan Marathon» marafonynyń qashyqtyǵy dástúrli túrde 10 shaqyrym spýtniktik jarys, 21,1 shaqyrym jartylai marafon, 42,2 shaqyrym marafon jáne 3 shaqyrym (10-14 jas aralyǵyndaǵy balalar) qashyqtyǵy bop bekitilgen.
Marafon AIMS halyqaralyq sóre men júgirý qaýymdastyǵynyń bir bóligi jáne trek World Athletics standarttaryna sai sertifikattalǵan.
Aita ketsek, marafon aiasynda 35 jastan asqan qatysýshylar arasynda 42,2 shaqyrym júgirý jarysy boiynsha Qazaqstan Respýblikasynyń chempionaty ótedi. Jeńimpazdarǵa arnaiy qarjylai jáne sertifikatty syilyqtar tabys etiledi.
