Túrkistan maqta zaýyty meditsinalyq ónimder shyǵaratyn elimizdegi birden-bir zaýyt
Búginde elimiz boiynsha maqtany tereń óńdep, ónim shyǵaratyn birden-bir zaýyt Túrkistan qalasynda ornalasqan. Jaqynda dalanews.kz saitynyń tilshileri zaýytta qonaqta bolyp, irgeli óndiris oshaǵynyń jumysymen tanysyp qaitty. Óz kzeginde zaýyt basshysy Marat Moldymanov kókeide júrgen oilaryn ortaǵa salyp, jeńil ónerkásip salasy, sonyń ishinde maqta toqyma salasyn damytýǵa qatysty óz oilaryn ashyp aitty.
Túrkistandaǵy maqta óńdeý zaýyty 2000 jyldan bastap jumys istep keledi. Al aryǵa bajailap qarasańyz, zaýyttyń irgetasy Keńes ókimeti qulaityn 90-jyldardyń basynda qalanǵanyn baiqaýǵa bolady.
– O basta bul zaýytty Qazaqstan men Ulybritaniia birlesip salǵan, keiinnen naryqtyq qiynshylyqtar bastalǵanda zaýyt jumysyn toqtatqan. Jalpy, bul zaýyttyń áleýeti zor. Munda Germaniia, Ulybritaniia, Italiiada shyǵarylǵan sapaly qondyrǵylar ornatylǵan. Bul jabdyqtarmen sapaly ónim shyǵarýǵa bolady. O basta zaýyt maqtany tazalap, aǵartýǵa baǵyttalǵan-dy. Al 2004 jyldan beri halyq tutynatyn ónim shyǵarý isimen ainalysyp kelemiz, – deidi zaýyt basshysy Marat Moldymanov.
Búginde elimizdegi maqta zaýyttarynyń kópshiligi egistikten jinalǵan maqta ónimderin shitinen tazartyp, tyǵyzdap, syrt elderge eksporttaýǵa daiyndaitynyn bilemiz. Qazaqstanda maqta Túrkistan oblysynda ǵana ósiriledi. Sondyqtan maqta zaýyttarynyń deni osy oblystyń aýmaǵynda ornalasqan. Túrkistan oblysyndaǵy zaýyttardyń kópshiligi maqtany shitinen, iaǵni, dáneginen aiyryp, jýyp tazalaý isimen ǵana ainalysady. Elimizde ósirilgen maqtadan taza ónim shyǵarmaidy. Al Túrkistan qalasyndaǵy ornalasqan maqta zaýyty maqtadan halyq kúndelikti turmysta tutynatyn meditsinalyq jáne kosmetikalyq buiymdar shyǵarý isin jolǵa qoiǵan birden-bir kásiporyn.
Zaýyt jumysshylary daiyn ónim shyǵarý úshin birinshi kezekte maqtany shitinen aiyrady. Budan soń maqtany shań-topyraqtan tazartyp, sorttaidy. Óitkeni meditsina men kosmetika salasyna qajetti ónim shyǵarý úshin birinshi sortty maqta qajet eken. Ábden suryptalǵan maqta 7 saǵat boiyna qainatylyp, tazartylady eken.
Dalanews.kz
