تۇركىستانداعى ماقتا وڭدەۋ زاۋىتى 2000 جىلدان باستاپ جۇمىس ىستەپ كەلەدى. ال ارىعا باجايلاپ قاراساڭىز، زاۋىتتىڭ ىرگەتاسى كەڭەس وكىمەتى قۇلايتىن 90-جىلداردىڭ باسىندا قالانعانىن بايقاۋعا بولادى.
– و باستا بۇل زاۋىتتى قازاقستان مەن ۇلىبريتانيا بىرلەسىپ سالعان، كەيىننەن نارىقتىق قيىنشىلىقتار باستالعاندا زاۋىت جۇمىسىن توقتاتقان. جالپى، بۇل زاۋىتتىڭ الەۋەتى زور. مۇندا گەرمانيا، ۇلىبريتانيا، يتاليادا شىعارىلعان ساپالى قوندىرعىلار ورناتىلعان. بۇل جابدىقتارمەن ساپالى ءونىم شىعارۋعا بولادى. و باستا زاۋىت ماقتانى تازالاپ، اعارتۋعا باعىتتالعان-دى. ال 2004 جىلدان بەرى حالىق تۇتىناتىن ءونىم شىعارۋ ىسىمەن اينالىسىپ كەلەمىز، – دەيدى زاۋىت باسشىسى مارات مولدىمانوۆ.
بۇگىندە ەلىمىزدەگى ماقتا زاۋىتتارىنىڭ كوپشىلىگى ەگىستىكتەن جينالعان ماقتا ونىمدەرىن شيتىنەن تازارتىپ، تىعىزداپ، سىرت ەلدەرگە ەكسپورتتاۋعا دايىندايتىنىن بىلەمىز. قازاقستاندا ماقتا تۇركىستان وبلىسىندا عانا وسىرىلەدى. سوندىقتان ماقتا زاۋىتتارىنىڭ دەنى وسى وبلىستىڭ اۋماعىندا ورنالاسقان. تۇركىستان وبلىسىنداعى زاۋىتتاردىڭ كوپشىلىگى ماقتانى شيتىنەن، ياعني، دانەگىنەن ايىرىپ، جۋىپ تازالاۋ ىسىمەن عانا اينالىسادى. ەلىمىزدە وسىرىلگەن ماقتادان تازا ءونىم شىعارمايدى. ال تۇركىستان قالاسىنداعى ورنالاسقان ماقتا زاۋىتى ماقتادان حالىق كۇندەلىكتى تۇرمىستا تۇتىناتىن مەديسينالىق جانە كوسمەتيكالىق بۇيىمدار شىعارۋ ءىسىن جولعا قويعان بىردەن-بىر كاسىپورىن.
زاۋىت جۇمىسشىلارى دايىن ءونىم شىعارۋ ءۇشىن ءبىرىنشى كەزەكتە ماقتانى شيتىنەن ايىرادى. بۇدان سوڭ ماقتانى شاڭ-توپىراقتان تازارتىپ، سورتتايدى. ويتكەنى مەديسينا مەن كوسمەتيكا سالاسىنا قاجەتتى ءونىم شىعارۋ ءۇشىن ءبىرىنشى سورتتى ماقتا قاجەت ەكەن. ابدەن سۇرىپتالعان ماقتا 7 ساعات بويىنا قايناتىلىپ، تازارتىلادى ەكەن.
Dalanews.kz
