Keles aýdanynda eldi mekenderdegi ishki kóshelerdi jóndeý jumystary jalǵasýda. Biyl aýdan aýmaǵyndaǵy 33,8 shaqyrym joldy jóndeý jumystarymen qamtý josparlanyp otyr,- dep habarlaidy Dalanews.kz
Búginde birqatar eldi mekenderde asfalt tóseý jáne jol negizin daiyndaý jumystary júrgizilýde. Atap aitqanda, Qoshqarata aýyldyq okrýgine qarasty Jambyl eldi mekeninde Sh.Tursynbaev kóshesiniń 2,6 shaqyrymyna asfalt tóseý jumystary bastaldy. Bul jumystardy «Saryaǵash Sáýlet» JShS atqarýda.
Sonymen qatar Qoshqarata aýyldyq okrýginiń Alǵabas, Jańaqonys jáne Qarabýra eldi mekenderindegi 4 ishki kóshege shaǵal tas tóselip, asfalt tóseý jumystaryna daiyndyq júrgizilýde. Bul kóshelerdiń jalpy uzyndyǵy 11 shaqyrymǵa jýyq. Jol qurylysynyń sapasyna «SK Qurylys injiniring» jáne «Ulttyq jol aktivteri sapasy ortalyǵy» mekemeleri turaqty túrde tehnikalyq baqylaý júrgizip otyr.
Jalpy, aýdan aýmaǵyndaǵy avtomobil joldarynyń uzyndyǵy 1172 shaqyrymdy quraidy. Ótken jyly 2 kóshe aýdandyq biýdjet esebinen, al 16 kóshe «Aýyl – el besigi» baǵdarlamasy aiasynda jóndelip, asfalttalǵan. Nátijesinde, aýdandaǵy kóshelerdiń 61 paiyzdan astamy jaqsy jáne qanaǵattanarlyq jaǵdaiǵa jetti.
Biyl «Aýyl – el besigi» baǵdarlamasy arqyly taǵy 21 kóshege ortasha jol jóndeý jumystary júrgiziledi. Onyń ishinde, Oshaqty aýyldyq okrýginiń Qońyrtóbe, Bereke eldi mekenderiniń 4 ishki kóshesine jáne Júzimdik aýyldyq okrýgi Júzimdik eldi mekeniniń 11 ishki kóshesine shaǵal tas tóselip, asfalt tóseý jumystaryna daiyndyq júrgizilýde. Bul kóshelerdiń jalpy uzyndyǵy 17,7 shaqyrymdy quraidy.
Odan bólek, Abai aýylyndaǵy Jambyl, Asan Qaiǵy, B.Qyrǵyzaliev, Tóle bi, Á.Jylqyshiev gúlzary men T.Rysqulov kóshesiniń batys bóligine aǵymdaǵy jóndeý jumystaryn júrgizý kózdelýde.
Jumystar tolyq aiaqtalǵanda, aýdandaǵy ishki kóshelerdiń 65 paiyzdan astamy jaqsy jáne qanaǵattanarlyq jaǵdaiǵa jetpek.
