Túrkistan oblysynyń ákimi Darhan Satybaldy Sozaq aýdanyna jumys sapary barysynda «Qazatomónerkásip-Saýran» ónim shyǵaratyn zaýytynda boldy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Kásiporyn tabiǵi ýran óndirýmen, ýrannyń shala totyǵy jáne tabiǵi ýrannyń himiialyq kontsentratyna deiingi óńdeýdi júzege asyrady.
2006 jyly qurylǵan kásiporynda 1 myńnan astam adam qyzmet etedi. Olardyń 95%-y – Sozaq aýdanynyń jergilikti turǵyndary. Oblys ákimi kásiporyn basshylyǵymen birqatar mańyzdy máseleni talqylady.
– Jergilikti halyqty qoldaýdy, ortaq áleýmettik sharalar uiymdastyrýdy kúsheitýdi usynamyz. Oqý oryndaryn ashýǵa bolady. Onda ózderińizge qajetti mamandardy daiarlansa jaqsy. Álemniń eń iri degen kásiporyndary qaiyrymdylyq jasaý jaǵyna da erekshe kóńil bóledi. Turǵylyqty halyqtyń qolaily ómir súrýi úshin jaǵdailar jasaidy. Endeshe sizderge de osy baǵytta jumystardy kúsheitýdi usynamyz. Kelisip jumys isteiik, – dedi Túrkistan oblysynyń ákimi Darhan Satybaldy.
Kásiporynda ýrandy tundyrý boiynsha affinajdyq tseh, ýran oksidi totyǵyn konteinerge túsirýdiń robottandyrylǵan kesheni jáne daiyn ónim qoimasy bar. «Kazatomprom-Sauran» JShS tabiǵi ýran óndirisin Túrkistan oblysynda ornalasqan «Qanjýǵan», «Ortalyq Moiynqum» jáne «Myńqudyq» ken oryndarynda júrgizedi. Sonymen qatar oblys ákimi Taýkent kentindegi «KATKO» qazaq-frantsýz birlesken kásipornyn aralady.
Tórtqudyq jańa zaýytynyń qurylysy men óndiris nysandarynda bolyp, jumysymen tanysty.
«Katko» qazaq-frantsýz birlesken kásiporny 1996 jyly Sozaq aýdanynyń aýmaǵyndaǵy Moiynqum jáne Tórtqudyq ken oryndaryn igerý maqsatynda iske qosylǵan. Sol jyldardan bastap óndiris orny memlekettik saiasatyn júzege asyryp, elimizdiń ekonomikalyq damýyna úles qosyp keledi. Jergilikti turǵyndardy jumyspen qamtyp, halyqtyń ál-aýqatyn jaqsartýǵa septigin tigizýde.
Ýran óndirýde kóshbasshy kásiporyn óńirdegi áleýmettik jobalarǵa da demeýshilik tanytýda. Qazirgi ýaqytta kásiporyn quramynda ýran bar ken jáne paidaly qazbalardy óndirý, óńdeý, tasymaldaý, saqtaý siiaqty qyzmet túrlerimen ainalysady. Munda 1327 adam jumyspen qamtylǵan. Onyń 50 paiyzǵa jýyǵy, iaǵni 611 adam – Sozaq aýdanynyń jergilikti turǵyndary. KATKO 2009 jyldan beri jergilikti ekonomikaǵa 4,8 milliard teńgeden astam investitsiia quiǵan.
