Astana qalasynda 28 qazan men 3 qarasha aralyǵynda Abai atyndaǵy memlekettik syilyqtyń laýreaty, Qazaqstannyń eńbek sińirgen qairatkeri, jazýshy-dramatýrg Roza Muqanovanyń dramatýrgiiasyna arnalǵan «TEATR ALL» III halyqaralyq teatr festivali ótti, dep habarlaidy Dalanews.kz Túrkistan oblysy ákiminiń baspasóz qyzmetine siltemejasap.
Astana qalasy ákimdiginiń qoldaýymen ótken festival maqsaty – kórermenderdi jazýshy-dramatýrg Roza Muqanovanyń shyǵarmashylyǵymen tanystyrý, halyqaralyq shyǵarmashylyq bailanystardy nyǵaitý jáne teatr ónerine jańa serpin berip, óskeleń urpaqqa keńinen nasihattaý. Oǵan Ázerbaijan, Qyrǵyzstan jáne Qazaqstannyń teatr ujymdary qatysyp, astanalyqtarǵa úzdik týyndylardy tartý etti.
Túrkistan mýzykalyq drama teatry atalǵan festivalge rejisser Farhad Moldaǵali sahnalaǵan «Fariza» qoiylymymen qatysty. Qazylar alqasynyń sheshimimen «Úzdik qoiylym» dep tanylyp, gran-pri iegeri atandy. Osylaisha teatr ujymy kezekti jeńisine qol jetkizip, atanyp, 1 mln teńge qarjylai syilyqqa ie boldy.
Aita keteiik, qoiylym úsh jyldan beri Túrkistan mýzykalyq drama teatrynda kóptiń suranysyna ie bolyp keledi. «Fariza» spektakliniń basty ideiasy – óreli aqyn, qoǵam qairatkeri, elimizge tanymal tulǵany halyqqa tereń tanytý, qoǵamdy ádebi-mádeni bailyqpen sýsyndatý, jastardyń intellektýaldyq belsendiligin damytý, teatr sahnasynda tehnikalyq múmkindikterdi paidalana otyryp kórermenniń qyzyǵýshylyǵyn arttyrý. Fariza Ońǵarsynovanyń ómiri men óleńi týraly pesany dramatýrg Roza Muqanova jazǵan.
