Sall-ortalyq densaýlyq saqtaý salasyndaǵy sapany jaqsartý úshin Túrkistan oblysy qoǵamdyq densaýlyq basqarmasy janynan qurylyp otyr. Oǵan óńirdegi kez kelgen turǵyn 1305 qysqa nómirin terý arqyly habarlasa alady. Sall-ortalyqtyń ashylý saltanatyna Túrkistan oblysy ákiminiń orynbasary Arman Sabıtov, Túrkistan oblysy Qoǵamdyq densaýlyq basqarmasynyń basshysy Marat Pashımov qatysty.
Sall-ortalyqtyń negizgi mindeti – oblystyq medısınalyq qyzmetterdiń jumysyn úılestirýdi jaqsartý, azamattardyń barlyq ótinishterin ýaqtyly baqylaý, sondaı-aq aqparattyq-taldaý ortalyǵyn qurý, turǵyndarǵa sapaly qyzmet kórsetý.
Bul – «Bir tereze» qaǵıdaty boıynsha densaýlyq saqtaý máselelerinde qala men oblys turǵyndaryna qyzmet kórsetýge arnalǵan biryńǵaı medısınalyq Call-ortalyqtyń mamandandyrylǵan baǵdarlamasy.
Turǵyndar Call-ortalyqqa qońyraý shalyp, belgili bir medısınalyq mekemeniń nemese naqty mamannyń jumysy týraly shaǵym jasap, densaýlyq saqtaý salasynda kásibı jaýaptar ala alady. Call-ortalyqqa kelip túsken shaǵymdar shuǵyl túrde qaralyp, operatorlardyń qyzmet kórsetý sapasyn baqylaý jónindegi bas dárigerlerdiń orynbasarlarymen tikeleı baılanysy arqyly pysyqtalatyn bolady.
Ortalyqta 12 adam jumys isteıdi. Onyń ishinde 10 operator elge qyzmet etedi. Olardyń bári – medısına salasynyń ókilderi.
Shaǵymdar negizinde toqsan saıyn oblystyń medısınalyq uıymdarynyń reıtıńteri jasalady. Bul baǵdarlama halyqqa qyzmet kórsetý salasyndaǵy medısınalyq mekemeler jumysynyń sapasyn, jedeldigin jáne aıqyndyǵyn arttyrýǵa múmkindik beredi.
1305 nómirine Túrkistan oblysy boıynsha uıaly telefondardan (barlyq uıaly baılanys operatorlary) qońyraý shalý-tegin. Sonymen birge WhatsApp arqyly 87711031313 nómiri boıynsha habarlama qaldyra alasyz nemese 1305.kz@mail.ru elektrondyq pochtasyna hat jazýǵa múmkindik bar. Bul ortalyq medısına mekemeleri men halyq arasyndaǵy baılanysty jaqsartyp, qyzmet sapasyn arttyrady dep josparlanyp otyr.
