Brifingte Túrkistan oblysyda kómir otynynyń qajettiligi 966,6 myń tonna, tasymaldanǵany 517 myń tonna (53%) ekeni aityldy. Qalǵany jylytý maýsymy bastalǵanǵa deiin tasymaldanady.
– Biýdjettik mekemelerdiń kómir otynyna qajettiligi 142,8 myń tonna, ol tolyq tasymaldanǵan. Ortalyqtandyrylǵan jylý beretin kásiporyndardyń kómirge qajettiligi 99,3 myń tonna, tasymaldanǵany 27,4 myń tonna (28%). Al oblys turǵyndarynyń kómirge qajettiligi 724,4 myń tonna bolsa, tasymaldanǵany 347 myń tonna (48%). Tasymaldaý jumystary jalǵasýda, – dedi Ábilhan Áskeruly.
Aýdan-qala ákimdikteriniń málimetine sáikes, oblys kóleminde 24 kómir tasymaldaityn oryn bar. Turǵyndar úshin temir jol tuiyǵy bar eldi-mekenderde 1 tonna Shubarkól otynnyń baǵasy 14 500-18 500 teńge aralyǵynda. Al temir jol tuiyǵy joq eldi-mekenderde 18 500-22 000 teńge arasynda. Ótken jyly qatty otyn baǵasy 13 500-18 500 teńge aralyǵynda bolǵan. Jalpy jylý berý maýsymyna daiyndyq barysy shtattyq rejimde jáne oblys ákiminiń qatań baqylaýynda.
