Biyl Arys qalasynda jalpy quny 29,5 mlrd teńgeni quraityn 26 investitsiialyq jobany qolǵa alyp, 400-den astam jańa jumys ornyn ashý josparlanyp otyr. 2024 jyly ónerkásip ónimderin arttyrý maqsatynda jalpy quny 15 mlrd teńgeni quraityn 22 investitsiialyq joba iske asyrylyp, 593 jumys orny qurylǵan. Bul jaiynda Arys qalasynyń ákimi Qaisar Mańqaraev BAQ ókilderimen ótken brifingte málimdedi,- dep habarlaidy Dalanews.kz
«Biyl shahardyń ekonomikalyq áleýetin arttyryp, turǵyndardy jumyspen qamtýǵa serpin beretin birqatar iri jobalar qolǵa alyndy. Máselen, aýyl sharýashylyǵy salasynda «Túrkistan Agro KZ» JShS-i 50 myń bas iri qara malyn bordaqylaý alańy men 3 myń gektar jerde jańbyrlatyp sýǵarý arqyly mal azyǵyn daiyndaý jobasyn iske asyrýda. Sondai-aq, «Túrkistan maqta agroónerkásiptik kesheni» JShS-i 13 mlrd teńgege tamshylatyp sýǵarý júiesi arqyly 9 myń gektar jerge maqta ónimin óndirý jobasyn qolǵa aldy. Budan bólek,«ALASH LOGISTIC» JShS-i jańbyrlatyp sýǵarý ádisimen 900 gektar jerge mal azyǵyn ósirý jobasyn iske asyrýda» - dedi qala ákimi.
Sondai-aq, qaladaǵy jalpy óńirlik ónim kólemi biylǵy jyldyń 4 aiynda 13,9 mlrd teńgege jetken. Al, ónerkásip óndirisiniń kólemi ótken jyly 10,3 mlrd teńgege jetse, 2025 jyldyń 4 aiynda 4,4 mlrd teńgeni qurap otyr. Qaladaǵy infraqurylym salasynda da birqatar ózgerister bar. Máselen, ótken jyly qaladaǵy 2 jylý qazandaǵynyń eskirýine bailanysty kómirden gaz júiesine kóshirý maqsatynda modýldik qazandyqtyń qurylysy júrgizilip, paidalanýǵa berilgen. Nátijesinde búginde qaladaǵy barlyq jylý qazandyqtary tabiǵi gazben jylytylyp otyr.
Sonymen qatar, qala turǵyndaryn sapaly elektr jaryǵymen qamtamasyz etý maqsatynda da birqatar iri jobalar qolǵa alyndy. Atap aitqanda, Shaǵyr, Baqyrsha jáne Aqtas eldi mekenderinde jalpy uzyndyǵy 20 shaqyrymdy quraityn eskirgen elektr jelileri tolyq jańartyldy. Bul jumystardyń nátijesinde 1206 adam turaqty jáne sapaly elektr qýatymen qamtamasyz etilip otyr.
