«Born Nomad» forýmyna AQSH-tyń Almatydaǵy bas konsýly Kerolaın Sevıdj, «Atameken» UKP basqarma tóraǵasynyń orynbasary Oljas Ordabaev, sondaı-aq jobaǵa qoldaý kórsetken «ExxonMobil» jáne «Chevron Kazakhstan» kompanıalarynyń ókilderi qatysty.
UKP basqarma tóraǵasynyń orynbasary Uıymdastyrýshylar ulttyq qolónershiler baıqaýy jáne forým qazaqstandyq qolónershilerdiń básekege qabilettiligin arttyryp, tanymal etýge yqpalyn tıgizetinine senim bildirdi.
«Born Nomad» jobasy 2000-nan astam qolónershiniń nazaryna iligip, onyń ishinde 400-den astam qolónershi bilimin shyńdap, bıznes daǵdysyn jetildirdi. 2021 jyl kreatıvti ekonomıkanyń jyly bolyp jarıalanǵany belgili. Bizde qolóner kásipkerligin jańa deńgeıge shyǵarýdyń erekshe múmkindigi bar. Bul áıelder bıznesi úshin óte mańyzdy. Biz «Atameken» tarapynan barlyq qoldaýdy kórsetýge daıynbyz», – dedi Oljas Ordabaev.
«Born Nomad jobasy kásipker áıelderge jan-jaqty múmkindik beredi, al olar óz kezeginde Qazaqstannyń mádenı murasyn álemge tanytady. Áıel múmkindikterin keńeıtý – Amerıka Qurama Shtattarynyń syrtqy saıası basymdyqtyń biri», – dedi bas konsýl K.Sevıdj.
Forým aıasynda «Born Nomad» ulttyq baıqaýynyń jeńimpazdary alty nomınasıa boıynsha marapattaldy. Atap aıtsaq, «Dástúr nomınasıasy» boıynsha Mádına Ahmetova (Shymkent), «Jańashyldyq nomınasıasy» boıynsha Ásel Mektepbaeva, «Qolónershi áıel» nomınasıasy boıynsha Damıra Ábikenova, «Jas talant» nomınasıasy boıynsha Ásel Mektepbaeva, «Shyǵarmashylyq yntymaqtastyq» nomınasıasy boıynsha Balnur Ahmetqazıeva (tórteýi de Nur-Sultan) jáne «3D-degi qolóner» nomınasıasy boıynsha Aıjan Tilenbekova (Almaty oblysy) jeńimpaz atandy. Al Gran-prı ıegeri Damıra Ábikenovaǵa (Nur-Sultan) 1 mıllıon teńge tapsyryldy.
Forýmda qolónershiler men kreatıvti ekonomıkany qoldaýdaǵy máseleler, memleket tarapynan kórsetiletin kómek, qyz-kelinshekterdi qoldaýǵa baǵyttalǵan jobalar talqylandy.
Forým sesıalarynyń biri qazaq qólóneri jáne onyń jahandyq kreatıvti ındýstrıada alatyn ornyn talqylaýǵa arnaldy.
Festıválde «Born Nomad» jobasyna qatysýshy qolónershiler buıymdary usynylǵan jármeńke ótti.
Aıta keteıik, «Atameken» Ulttyq kásipkerler palatasy men AQSH dıplomatıalyq mısıasy birlesip jarıalaǵan bul baıqaýǵa elimizdiń 2000-nan astam qolónershisi qatysty. Baıqaý dástúrli qolónerdi nasıhattap, mádenı murany saqtaý arqyly áıelderdiń ekonomıkalyq damýy men kásipker áıelderdi qoldaýǵa arnalǵan «Qolónershi múmkindikterin keńeıtý» atty aýqymdy joba aıasynda ótti. Forýmnyń Túrkistan qalasynda ótýi de kezdeısoq emes. Túrkistan – ejelden qolóneri damyǵan ári Uly Jibek Joly boıynda saýda salasy damyǵan shahar.
