Búginde Túrkistan oblysy turǵyndarynyń 80 paıyzy aýyldy eldi mekenderde turady. Sondyqtan aýyldardy qajetti ınfraqurylymmen qamtý – basty baǵyttardyń biri, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Túrkistan oblysynda bir jylda múldem aýyz sýy joq 10 eldi mekendegi 9 myń turǵyn aýyz sýmen qamtyldy. Sondaı-aq 10 eldi mekendegi tozyǵy jetken aýyz sý qubyrlary jańartylǵan.

Memleket basshysynyń tapsyrmasyna sáıkes, 2025 jyldyń qorytyndysymen Túrkistan oblysynyń halqy 100 paıyz aýyz sýmen qamtamasyz etilýi tıis.

Túrkistan oblysynyń ákimi Darhan Satybaldy osy baǵytta atqarylyp jatqan jumystardyń barysyn pysyqtady. Oblysta 720 eldi meken aýyz sýmen qamtamasyz etilgen. Jyl sońyna deıin 16 eldi mekende sý júıeleri júrgizilip, aýyz sý beriledi.

Eldi mekenderdi úzdiksiz jáne sapaly aýyz sýmen qamtý úshin jer asty sý ken oryndaryn, sý kózderine izdeý-barlaý jumystaryn júrgizip jatqan ýákiletti organdar tarapynan sý qorlary bekitilýde.

Bul másele boıynsha oblystyq energetıka jáne turǵyn úı-kommýnaldyq sharýashylyq basqarmasynyń basshysy Rýslan Muzdybekov baıandady.

Óńirde halyqty ortalyqtandyrylǵan aýyz sýmen qamtamasyz etý boıynsha júıeli jumystar júrgizilýde. 2018 jyly oblysta 622 eldi meken (7 qala, 615 aýyldyq eldi meken) aýyz sýmen qamtamasyz etilgen bolatyn.

5 jylda ortalyqtandyrylǵan aýyz sýmen eldi mekenderdiń jalpy sany 720-ǵa jetti (7 qala, 713 aýyldyq eldi meken) nemese 86,4 %-ǵa artyp, 2025,3 myń adam sapaly aýyz sýmen qamtylyp otyr.