Túrkistan. Ana men bala quqyǵynyń qorǵaý – basty nazarda
Shymkentte osy keńestiń balalardyń quqyqtary men zańdy múddelerin qorǵaýdy qamtamasyz etý júiesin jetildirý boiynsha usynystardy zerdeleý jáne jinaýǵa jaýapty jumys tobynyń qatysýymen jiyn ótti. Jiyndy Túrkistan oblysy ákiminiń orynbasary Sáken Qalqamanov júrgizdi.
Basqosýda balalar quqyǵyn qorǵaý salasyndaǵy baiandamalar men esepter tyńdalyp, ózekti máseleler talqylandy.
Óz kezeginde «Nur Otan» partiiasy janyndaǵy balalardyń quqyqtaryn qorǵaý keńesiniń múshesi, toptyń konsýltant-jetekshisi Rysty Jumabekova bul jumys saparynyń maqsatyna toqtaldy.
Onyń aitýynsha, arnaiy top óńirdegi Jol kartasynyń «Baqytty otbasy» partiialyq jobasymen tanysady. Qiyn jaǵdaiǵa tap bolǵan otbasylarǵa kómektesý jáne balalyq shaqtyń qorǵalýyn qamtamasyz etý quraldaryn engizý, óńirlik deńgeide balalardyń quqyqtary men bostandyqtaryn qamtamasyz etetin mekemelerdiń qyzmetimen tanysý da nazarda tur.
«Nur Otan» partiiasy janyndaǵy balalardyń quqyqtaryn qorǵaý keńesi tóraǵasynyń orynbasary, jumys tobynyń jetekshisi Dinara Zakieva da talqylanǵan máseleniń mańyzdylyǵyna toqtaldy.
Jiynda jergilikti politsiia, adami áleýetti damytý, qoǵamdyq densaýlyqty saqtaý, jumyspen qamtýdy úilestirý jáne áleýmettik baǵdarlamalar basqarmalarynyń esepteri tyńdaldy. Balalardyń jaǵdaiy týraly statistikalyq málimetter men otbasylardy qoldaý boiynsha júzege asatyn jobalar talqylandy.
«Nur Otan» partiiasy Túrkistan oblystyq filialy tóraǵasynyń birinshi orynbasary B.Tájibaev óz baiandamasynda «Baqytty otbasy» partiialyq jobasy boiynsha filial janynan 117 adamnan quralǵan top qurylǵanyn atap ótti.
Bul top memlekettik organdarmen birlesip jumys istep, óńirdegi negizgi úsh máseleni anyqtaǵan. Olar – álimjettik, zorlyq-zombylyq jáne sýitsid. Óńirde reidter nátijesinde 8 aida ata-ana baqylaýynsyz qalǵan 62 jasóspirim beiimdeý ortalyǵyna ornalastyrylǵan. Ókinishtisi sol, oblysta jasóspirimder qylmysy men sýitsidi de az emes.
– Jańa oblys qurý barysynda balalar máselesimen ainalysatyn mekemeler men kásibi mamandardyń kóbi Shymkentte qalyp qoidy. Sondyqtan Túrkistan oblysynda psihologiialyq jáne zorlyq-zombylyqqa ushyraǵandardy ońaltý ortalyqtaryn ashý – kezek kúttirmeitin is. Partiia filialy osy baǵytta belsendi jumysqa kóshedi, – dedi B.Tájibaev.
Úsh kúnge josparlanǵan sapar aiasynda jumysshy top Túrkistan oblysyndaǵy 80-nen astam bilim berý, meditsina, iývenaldy politsiia, áleýmettik qorǵaý jáne ózge de mekemelerge kirip, jumysymen tanysady. Atap aitqanda Túrkistan, Arys qalalary men Saryaǵash, Shardara, Qazyǵurt, Túlkibas, Tólebi, Sairam aýdandaryn aralap, jumys júrgizedi. Sonymen birge kópbalaly analardy turǵyn úimen qamtamasyz etý, jumysqa ornalastyrý, balalarǵa qosymsha tegin bilim berý joldary talqylanyp, ózge de máseleler boiynsha eldiń usynystary tyńdalady.
«Nur Otan» partiiasy Túrkistan oblystyq filialynyń baspasóz qyzmeti
