Kedeishilik pen uzaqqa sozylǵan jumyssyzdyq keibir túrikmen áielderin otbasylaryn asyraý úshin jezókshelikpen ainalysýǵa májbúr etýde. Túrkimenstandaǵy Azatlyq radiosy uiat ispen ainalysqan birer kelinshekti áńgimege tartyp kórdi. Sonyń biri "balasy ash bolsa, qandai ana basqa salǵanǵa kónip jaibaraqat otyra beredi" degendi aitady, dep jazady Dalanews.kz.
Maral eki kishkentai balasyn asyraý úshin seks-quldyqqa jegilgen, dep jazady Azatlyq radiosy. Quldyq demeske shara bar ma? Ózge kásip sekildi tapqanyn munda tolyqtai qolyna tie bermeidi. Al qoǵam jezóksheni adam qurly sanamaidy. 38 jastaǵy Maral búginderi otbasyn jalǵyz asyraýshysy, bastapqyda medbike bolǵan ol jumystan qysqaryp qalǵan. Tórt jyl buryn jezókshelikpen ainalysýǵa májbúr bolǵan.
"Kiim-keshek, mekteptiń zattaryn túgendemek túgili, meniń balalarymnyń bir apta ystyq tamaqsyz otyrǵan kezderi boldy", - deidi Maral (aty ózgertilgen).
Eldiń ońtústik-shyǵysyndaǵy Túrikmengala qalasynyń týmasy Maral kúieýiniń Túrkiiaǵa aqsha tabýǵa ketkenin aitady. Biraq biraz ýaqyttan keiin jubaiy oǵan aqsha jiberýdi, onymen sóilesýdi doǵarǵan. Maral jergilikti jumyspen qamtý ortalyǵyna tirkelgenimen, biraq jumysqa tura almapty. Ol maqta alqabyna shyǵyp, maýsymdyq jumysqa jegilgen. Jumys aýyr bolǵanymen, aqysy mardymsyz. Maral jalǵa alǵan páteriniń aqysyna tapqany áreń jetetinin, al otbasynyń kúndelikti jeitin tamaǵy qara shái men nan bolǵanyn aitady.
"Bizge kómektesetin eshkim joq. Ata-anam bolsa, qart adamdar, al enemniń densaýlyǵy nashar. Men birneshe ret áleýmettik qyzmetterden kómek suradym, biraq eshqandai qoldaý bolmady", - deidi Maral.
Túrikmenstanda jezókshelikke tyiym salynǵan, sondyqtan bul salada júrgen qyz-kelinshekter óz jumysyn otbasylarynan meiilinshe jasyrýǵa tyrysady. Maral kúnkórý úshin jol boiyna shyqqan jalǵyz kelinshek emes, mundailar qatary san myńdap.
"Biz jetiskennen jezókshe bolǵanymyz joq. Mundai jaǵdaiǵa sharasyzdyq alyp keldi bizdi. Eger úkimet bizge jumys berse, eshkim jezókshe bolmas edi", dep túsindiredi atyn atamaýdy suraǵan eldiń ońtústik-shyǵysyndaǵy Maryi ýálaiatynyń turǵyny.
Sońǵy jyldary jezókshelik kórinisi ulǵaia túsken, óitkeni elde ómir súrý quny kúrt ósti, - deidi anonimdilikti saqtaýdy suraǵan Maryi jáne Lebap ýálaiattarynyń turǵyndary. Jas áielder klientterin, negizinen barlar men meiramhanalardan tabady.
Qyzmetterdiń quny 60 dollardan 140 dollarǵa deiin. Egde jastaǵy áielder, ádette klientterdi júk kólikteri men avtoturaqtardan izdeidi. Olardyń alatyn aqysy - 15-30 dollar aralyǵynda. Olar ár kez basyn qaýip-qaterge tigedi: jynystyq jolmen beriletin aýrýlardy juqtyryp alý, zorlyq-zombylyq pen adam saýdasynyń qurbany bolý yqtimaldylyǵy.
"Keibir tutynýshylar aldyn ala kelisilgen tólemdi jeme-jemge kelgende tóleýden bas tartady. Olardyń keibireýleri óte dóreki, fizikalyq jáne jynystyq zorlyq-zombylyqty qoldanady, tipti bizdi sabap tastaidy", - deidi lebaptyq jezókshe.
Jezókshelikpen ainalysatyndar kúsh organdary tarapynan qanaýǵa, bopsalaýǵa ushyraitynyn aitady.
Maryi jáne Lebap ýálaiattarynyń birneshe qyz-kelinsheginiń aitýynsha, politsiia olardy jii ustap alyp, maqta terýge, basqa da aýylsharýashylyq jumystaryna tegin jegedi.Odan bólek Túrkimenstan biligi stýdentterdi, muǵalimderdi jáne basqa da memlekettik qyzmetkerlerdi maqta terýge únemi májbúrleidi eken.
"Biz [aimaqtyq] politsiia men prokýratýranyń joǵary laýazymdy sheneýnikteriniń qysymyna jii tap bolamyz. Bizdi ýchaskelerge aparyp, sottamaimyz, aiyppul salmaimyz, bosatyp jiberemiz, biraq "biz suraǵan kezde tegin qyzmetke daiyn bolyńdar" dep eskertedi. Sondyqtan olar ár kez qońyraý shalǵanda, tegin qyzmetke baramyz", — deidi jezókshelerdiń biri. Áiel sheneýnikterdiń atyn atamady.
