Túrkiianyń TAV Airports kompaniiasy Almaty halyqaralyq áýejaiyndaǵy sońǵy 15 paiyzdyq úlesti 133 million AQSh dollaryna satyp almaq. Osy mámile aiaqtalǵannan keiin kompaniia áýejaidy tolyqtai óz baqylaýyna alady, dep habarlaidy dalanews.kz.
Kompaniianyń investorlarǵa joldaǵan málimetine sáikes, buryn áýejaidyń 15 paiyz úlesine ielik etken KIF Warehouses Coöperatief U.A. óz úlesin satýǵa sheshim qabyldaǵan. Osyǵan bailanysty TAV Airports atalǵan úlesti satyp alý týraly kelisim jasaǵan.
Kompaniia ókilderiniń aitýynsha, Almaty áýejaiy jolaýshylar aǵyny men operatsiialyq kórsetkishteri boiynsha turaqty ósim kórsetip keledi. Sondai-aq ol Ortalyq Aziiadaǵy mańyzdy áýe habtarynyń biri retinde óz pozitsiiasyn nyǵaityp jatyr.
Mámile quny 133 million AQSh dollaryn quraidy. Kelisim tolyq aiaqtalǵannan keiin TAV Airports Almaty halyqaralyq áýejaiynyń jalǵyz iesi bolady.
Eske salsaq, Almaty áýejaiy 2011 jyly Timýr Qulybaevqa qatysy bar qurylymdardyń ieligine ótken. Al 2021 jyly ony TAV Airports pen Kazakhstan Infrastructure Fund birlesip satyp aldy. Bastapqyda mámile quny 415 million dollar dep jariialanǵanymen, pandemiiaǵa bailanysty taraptar baǵany 365 million dollarǵa deiin tómendetken. Kelisim shartynda jolaýshylar sany qalpyna kelgen jaǵdaida qosymsha tólem qarastyrylǵan edi.
