Túrkistanda Túrki memleketteri uiymyna múshe elderdiń qaýipsizdik keńesteri hatshylarynyń úshinshi kezdesýi ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jiynǵa QR Qaýipsizdik Keńesiniń hatshysy Ǵizat Nurdáýletov qatysty. Kezdesý barysynda taraptar TMU keńistigindegi qaýipsizdik pen turaqtylyq salasyndaǵy ahýal jóninde pikir almasty.
Jiynda terrorizm men ekstremizmge, qarý men esirtkiniń zańsyz ainalymyna, transulttyq uiymdasqan qylmysqa qarsy is-qimyl úshin yntymaqtastyqty damytý máseleleri talqylandy. Sondai-aq halyqaralyq aqparattyq qaýipsizdikti qamtamasyz etý, kólik-logistika infraqurylymyn damytý aspektileri qarastyryldy.
Ǵizat Nurdáýletov lańkestik qaýip-qaterler týraly turaqty jáne tiimdi aqparat almasý, halyqaralyq terroristik uiym qataryndaǵy sodyrlar men rekrýttar qozǵalatyn, sondai-aq lańkestik áreketti qarjylandyratyn túrli arnalardyń jolyn kesý boiynsha ózara kelisilgen is-qimyl júrgizýdiń mańyzdy ekenin atap ótti.
Onyń aitýynsha, qazirgi kezde sheteldik internet-resýrstardy paidalana otyryp jasalatyn transulttyq qylmystarǵa qarsy kúresýdiń, sondai-aq kiberqaýipsizdik deńgeiin arttyrýdyń mańyzy arta tústi.
Budan bólek, jiynda kólik qaýipsizdigin, sonyń ishinde óńirdegi elderdi ózara jalǵaityn kólik-logistika baǵyttarynyń ornyqty jumys isteýin qamtamasyz etý máselesi óte ózekti ekenine nazar aýdaryldy.
