Búgin Almaty oblysyndaǵy Kúrti sý qoimasynda aýqymdy senbilik ótti. Oǵan aýyl turǵyndary, jastar, eńbek ujymdary men eriktiler qatysty. 800-ge tarta adam kózdiń jaýyn alatyn Kúrtiniń ainalasynan 5 tonnaǵa jýyq qoqys jinady, dep habarlaidy dalanews.kz.
Úsh kúndik demalysta óńirdegi týristik nysandardyń tazalyǵyna erekshe den qoiylǵan. «Tazalyq kúni» aktsiiasy «Taza Qazaqstan» ekologiialyq baǵdarlamasy aiasynda jalǵasyp jatyr. Kúrti sý qoimasy aty ańyzǵa ainalǵan «Qyz Jibek» kórkem filmi arqyly halyqqa keń tanylǵan meken. Tarihi aimaq qazir qaita jandanyp, týrister jii keletin demalys ornyna ainalǵan. Bul jerge kúnine 1500-2000-ǵa jýyq saiahatshy keledi. Sondyqtan tumsa tabiǵattyń tazalyǵy basty nazarda. Búgingi senbilikke oblys ákimi Marat Sultanǵaziev te atsalysyp, ekologiialyq mádenietti saqtaýdyń mańyzyna toqtaldy.
«Almaty oblysynda qyzyqtap-kóretin tabiǵaty erekshe nysandar kóp. Ózen-kól, taý-qyratymen qosa jazyq dalasy da janǵa jailylyq syilaidy. Al Ile aýdanyna kelgen qonaq darhan dalanyń keremetine kýá bolady. Qazirgi tańda Kúrti sý qoimasy úlken tanymaldyqqa ie bolyp, týristerdiń súiikti mekenine ainalǵan. Sondyqtan aýmaqtyń taza ári jaily bolýy mańyzdy», – dedi óńir basshysy.
Aita keteiik, «Tazalyq kúni» aktsiiasy oblystaǵy tanymal týristik baǵyttardyń barlyǵynda qarqyndy júrgizilýde. Atap aitqanda:
- Kegen aýdany – Kólsai, Qaiyńdy kólderi;
- Uiǵyr aýdany – «Sharyn» memlekettik ulttyq tabiǵi parki;
- Eńbekshiqazaq aýdany – Esik kóliniń jaǵalaýy;
- Jambyl aýdany – Úńgirtas aýylyndaǵy «Jer kindigi» týristik nysany;
- Raiymbek aýdany – Shalkóde jailaýy men Tuzkól kóliniń jaǵasy;
- Qonaev qalasy – «Almaty–Óskemen» tasjoly boiy jáne «Kóshpendiler qalashyǵy» aýmaǵy;
- Talǵar aýdany – Talǵar ózeniniń boiy;
- Balqash aýdany – Jideli aýyldyq okrýgindegi «Zavidovo» týristik kesheni;
- Ile aýdany – Pervomai toǵandary, «Sokol» sporttyq-tehnikalyq kesheni, «Rybatskaia ýsadba» demalys orny, «Tortuga» demalys bazasy jáne «Dubai Resort» akvaparki;
- Alataý qalasy – «Eńbek» jáne «Zarechnyi» shaǵyn aýdandary.
Oblys boiynsha búgingi tazalyq jumystaryna 12 myńǵa jýyq adam qatysyp, 135 arnaiy tehnika jumyldyryldy. Nátijesinde 205 tonnaǵa jýyq turmystyq qaldyq jinalyp, arnaiy poligonǵa shyǵaryldy.
«Keń baitaq jerimizdiń kórkin saqtaý – árqaisymyzdyń mindetimiz. Búgin senbilikke qatysyp, sulý mekenniń sánin ketirgen qoqystardy jinadyq. Munda otbasymyzben jii kelip turamyz. Kózdiń jaýyn alatyn tabiǵat jaýharyn qorǵaý –barshamyzdyń ortaq jaýapkershiligimiz», – dep atap ótti senbilikke qatysqan Aqshi aýylynyń turǵyny Móldir Toǵaeva.
«Tazalyq kúni» aktsiiasy erteń, iaǵni 3 mamyr kúni de jalǵasyp, úsh kún boiy óńirdegi týristik baǵyttarda júrgizilgen tazalyq sharalary qorytyndylanady.
