Túrik pianisti Týlýihan Ýgýrlýnyń «Ahmet Iasaýi» kontsertteri
Kontsertterde 850 jyl buryn qazaq dalasynda dúniege kelgen Qoja Ahmet Iasaýi kórermenge mýzyka tilimen tanytylady. Sahna kórinisteri qazaqsha jáne túrikshe eki tilde qatar usynylady. Batys áli qarańǵylyqtyń túneginde jatqan kezde babamyz alǵa tartqan «oilaný jáne eńbek etý ǵibadat» filosofiiasynyń Seljýk jáne Osman imperatorlyǵy kezeńindegi mádeniet, memleket jáne din júiesine jasaǵan yqpaly sahnada tarqatylady.
Týlýihan Ýǵýrly Iasaýidiń týǵan jerinde jáne Astanalyq kórermender aldyna shyǵyp ǵulama babamyzǵa arnaǵan shyǵarmasyn oryndaý ózin qatty tolqytatynyn tilge tiek ete otyryp bylai deidi: «Uzaqta bir ǵulamaǵa arnap shyǵarma jazasyz jáne ony sol ǵulamanyń týǵan jerine baryp oryndaisyz. Bul degenińiz sózben jetkizip aitýǵa bolmaityn baqyt! Qazaqstan, Iasaýidiń júrip ótken jerleri, Túrkistan jáne Shymkent men úshin óte qymbat, qasietti oryndar. Bul jerlerdi baryp kórý boryshymyz, mindetimiz».
Týlýihan Ýǵýrlý «dál qazir elde qalyptasqan aýyr kezeńde Túrkiiaǵa qoldaý bildirgen, ishi men syrty birdei, sózine berik baýyrlas el Qazaqstanda óner kórsetý ózin erekshe kóńil tolqynysyna bóleitinin» aita kele Iasaýidiń filosofiiasyna qatysty kózqarasyn bylaisha túiindeidi.
"Aǵartýshylyq úderisi aldymen bizde, al Batysta bizden keiin bastaý aldy. Iaǵni, eldiń túsinigindegidei álem Renessans dáýirinen bastap qaita jańǵyryǵyp órlemedi. Álem Aziiadan Anadolyǵa, Anadolydan Balqandarǵa qarai shashyraǵan sáýlemen túledi, órledi. Ahmet Iasaýi túrki halyqtaryna eń qarapaiym jáne eń durys jolmen Islamdy tanytty. Iasaýi joly Seljýk memleketi men Osman imperiiasynyń negizgi ideiasyna arqaý boldy. Sondai-aq ózinen keiingi bilim jáne din adamdarynyń kóshbasshysy bola bildi. Seljýk jáne Osman imperiiasynyń qarapaiymdylyǵy, danalyǵy, kúsh –qýaty men jetistiginiń túp negizi Iasaýi ilimimen sýsyndaýynda jatyr. Hoja Ahmet Iasaýi er-áiel teńdigin dáriptegen, ár kim óz janyn ózi baqqany jón degen, "bilim - adamdy Allaǵa tabystyrǵan jáne bolmysty bilip jaratýshyny tanýdy qamtamasyz eter jol" dep aitqan uly tulǵamyz. Sondyqtan, budan bylai eń aldymen óz tól qundylyqtarymyzdy qaitadan ulyqtap úirenýimiz kerek degen oidamyn. Bul uzyn jolda atqarylatyn qyrýar is bar. Bul istiń irge tasy men túp qazyǵynyń biri - Hoja Ahmet Iasaýi".
Iia, Ahmet Iasaýi myń jyl buryn qaldyrǵan pikirlerimen áli kúnge deiin aramyzda, bizderdi oiǵa jeteleidi. «Oilaný jáne eńbek etý ǵibadat».
