Biyl ShQO-da áleýmettik nysandarmen birge turǵyn úi qurylysy qarqyn almaq. Qurylys, sáýlet jáne qala qurylysy basqarmasynyń aqparaty boiynsha, biyl aimaqta 190 mlrd teńgege 694 myń sharshy metr turǵyn úi nemese 6 361 páter salý josparlanǵan. Salynyp jatqan turǵyn úilerden Otbasy banktiń «Otaý» baǵdarlamasy arqyly jeńildikpen páter alýǵa bolady, dep habarlaidy Dalanews.kz.
Taiaýda ótken Ulttyq quryltaida Prezidentimiz Qasym-Jomart Toqaev elimizde qurylys salasynyń qarqynyn arttyrýǵa erekshe mańyz berdi.
– Baspana – jurttyń turmys sapasyn tanytatyn taǵy bir mańyzdy kórsetkish. Biyl 1 naýryzdan bastap iske qosylǵan «Otaý» ipotekalyq baǵdarlamasy el ishinde úlken suranysqa ie bolyp otyr. Buǵan qosa aýyl jáne aýdan ortalyǵynyń turǵyndaryna arnalǵan jańa turǵyn úi baǵdarlamasyn qolǵa alý kerek. Bul rette áleýmettik turǵyda osal toptaǵy jandar úshin nesie ósimi 7 paiyzdan aspaýy qajet. Sonymen qatar satyp alý quqyǵymen jalǵa beriletin baspana sanyn birneshe ese kóbeitýdi Úkimetke tapsyramyn. Jeńildetilgen jańa ipotekanyń engizilýi jáne jalǵa beriletin turǵyn úidiń kóptep salynýy qurylys qarqynyn arttyrady. Qurylys salasynda júz myńdaǵan otandasymyz adal eńbek etip júr. Eń bastysy, bul baǵdarlama baspanaǵa muqtaj kóptegen adamnyń úi alýyna jol ashady, - dedi Memleket basshysy halyqty qoljetimdi, sapaly baspanamen qamtýǵa orai bergen tapsyrmasynda.
Oblys ákimdiginde ótken kezekti jiynda aimaq basshysynyń halyqty qoljetimdi jáne sapaly baspanamen qamtamasyz etý maqsatynda turǵyn úi qurylysynyń kólemin arttyrý jónindegi tapsyrmasynyń oryndalý barysy talqylandy.
– 2024 jyly barlyq qarjylandyrý kózderinen 3201 páter salynyp, osynshama otbasy qonys toiyn toilamaq. Aldyn ala boljam boiynsha baspana qurylysynyń kólemi byltyrǵydan 101,7 paiyzǵa artpaq. Sonyń ishinde 26 kópqabatty turǵyn úi salynyp, osy úilerdegi 2 305 qolaily páter paidalanýǵa beriledi, – dedi oblystyq qurylys, sáýlet jáne qala qurylysy basqarmasy basshysynyń orynbasary Saiat Toikenov.
Sonymen qatar osy jyly «Bir qabatty Shyǵys» baǵdarlamasy boiynsha 2,6 mlrd teńgege 156 páter salynady. Biylǵy qańtar, aqpan ailarynda paidalanýǵa berilgen jekemenshik turǵyn úi qurylysynyń kólemi byltyrǵydan 102,6 paiyzǵa óskenin aita ketken abzal.
Elimizde biylǵy 1 naýryzdan bastap «Otaý» baǵdarlamasy iske qosyldy. Óńir turǵyndary 30 sáýirge deiin Baspana market (otbasybank.kz) portalynda baǵdarlamaǵa qatysý týraly ótinish joldai alady. Baǵdarlama boiynsha bastapqy jarna 20%-dan bastalady. Nesie boiynsha jyldyq mólsherleme – 9% (JES 9,2% bastap). Nesie merzimi - 19 jyl.
Búginge deiin elimizde 10 myńnan astam adam turǵyn úi satyp alý úshin biregei sharttardy usynatyn «Otaý» baǵdarlamasyna ótinim berip úlgergen. Baǵdarlama aldaǵy jeti jylǵa arnalǵan, sondyqtan bul múmkindikti paidalanǵysy kelgender qazirden bastap jinaq júrgizýi qajet. Al eger bank salymshysy baǵdarlamanyń sharttaryna sai bolsa, biylǵy 30 sáýirge deiin ótinish berýge ýaqyty bar.
