Turǵyn úi qoryn jańartý halyqtyń ómir súrý deńgeiin jaqsartýdyń mańyzdy mindetteriniń biri bolyp tabylady. Jańaózende turǵyn úi qorynyń apattylyq jaǵdaiy men tozyǵy jetýi máseleleri kún tártibinde tur. Mundai jaǵdaida turǵyn úidi jańǵyrtý máselesi birinshi orynǵa shyǵady.
2022 jyldan bastap Jańaózende 2020-2025 jyldarǵa arnalǵan "Nurly jer" memlekettik turǵyn úi-kommýnaldyq damý baǵdarlamasyna sáikes turǵyn úi qoryn jańartý baǵdarlamasy jumys isteidi. Osy maqsattarǵa biýdjetten 1,2 mlrd. teńge bólindi.
Qazirgi ýaqytta Jańaózen qalasynda 262 kópqabatty úi bar, onyń 232-si 1960-1980 jyldar aralyǵynda salynǵan. Aǵymdaǵy jóndeý jumystary aiasynda olardyń ekeýi apatty dep jariialanyp, ol úilerdiń 200-den astam turǵyny basqa úilerge kóshirildi.
Sonymen qatar, Jańaózende 40 eski úi bar, qazirgi tańda olardyń aǵymdaǵy jaǵdaiyn anyqtaý úshin, saraptamalyq baǵalaý júrgizýge jiberildi. Taldaý nátiejesi belgili bolǵan soń, apattyq dep tanylǵan ǵimarattar buzylyp, qalǵandary kúrdeli jóndeýden ótedi.
Jańaózen turǵyndaryn tolǵandyratyn taǵy bir másele-sý tapshylyǵy. Qalada jazda - ortasha eseppen táýligine 42 myń tekshe metr, al qysta - táýligine 30 myń tekshe metrge deiin sý beriledi.
Bul máseleni sheshý úshin 2025 jylǵa deiingi keshendi damý jospary sheńberinde qýattylyǵy táýligine 50 myń tekshe metr teńiz sýyn tushytý zaýytyn iske qosý josparlanǵan.
Halyqpen alty saǵattyq kezdesýde turǵyndar jumyspen qamtý, meditsinalyq qyzmetterdiń sapasy, biznesti damytý, eski kóppáterli úilerge kúrdeli jóndeý júrgizý siiaqty túrli suraqtar qoidy.
Esepti kezdesýge qatysqandardyń keibiri turǵyn úi alýǵa járdemdesý, sondai-aq munai-gaz salasyna jumysqa ornalastyrý týraly ótinish jasady.
Nurlan Noǵaev halyqtyń týyndaityn barlyq máselelerin qoldanystaǵy zańnama sheńberinde sheshý qajet ekenin atap ótti.
- Prezident Qasym-Jomart Toqaev óz Joldaýynda memlekettik organdardyń óz jumysynda ádildik pen ashyqtyq qaǵidattaryn basshylyqqa alýynyń ajyramas mańyzdylyǵyn bildirdi. Ol halyqta týyndaityn barlyq máseleler, sonyń ishinde jumysqa ornalasýǵa jáne aýyz sýǵa qol jetkizýdi qamtamasyz etýge bailanysty máseleler qoldanystaǵy zańnamaǵa sáikes qatań sheshilýi tiis ekendigine erekshe nazar aýdardy. Munai-gaz salasyna jumysqa ornalasýǵa keletin bolsaq, men kelisilgen algoritmniń talaptaryn saqtamai, barlyǵyn, tipti kezeksiz uiymdastyrýdyń múmkin emestigi týraly birneshe ret aittym.
Biz árqashan ashyq dialog qurýǵa daiynbyz. Alaida osy tusta meniń atap ótkim keletin másele-tek munai ónerkásibinde ǵana emes, basqa salalarda da qyzmet atqarý múmkinshilikterin qaraý kerek. Máselen, kóptegen turǵyndarymyz dárigerlerdiń tapshylyǵy týraly aitady, osy máseleni sheshý úshin memleket kóptegen granttar bólip tegin bilim berýde. Sondai-aq, biznespen ainalysamyn deitin jandarǵa-biz memlekettik qoldaý sharalaryna kepildik beremiz. Sonymen qatar, bolashaqta jasyl energetika, aýyl sharýashylyǵyn damytý jáne basqa da kóptegen jańa salalarda múmkindikter óte kóp, - dedi Mańǵystaý oblysynyń ákimi.
Esepti kezdesý aiaqtalǵan soń Nurlan Noǵaev Jańaózenniń 88 turǵynyn qabyldady. Al Jańaózen qalasyna úsh kúndik is-sapar barysynda aimaq basshysy jalpy esepte 145 turǵynmen jeke kezdesip, máselelerin tyńdady.
