Qýandyq Bishimbaevtyń inisi Baqytjan Baijanov sot otyrysynda málimdeme jasady, - dep habarlaidy Dalanews.kz.
Baijanov qaiǵyly oqiǵa bolǵan kúni Saltanat Núkenovany birneshe ret kórgenin aitty.
"Saltanattyń bir kózi isip turǵanyn kórdim. Vip-bólmeniń ishiniń astań-kesteńi shyǵyp jatty, dárethananyń esigi qiraǵanyn kórdim. Tańerteń gastroortalyqqa kelgen kezde Bishimbaev túni boiy shý shyǵaryp, ishimdik iship, Saltanatty kezekti ret uryp tastaǵanyn bilip keldim. Bul týraly gastroortalyqqa keler aldynda habardar boldym. Biraq ol kezde eshteńe túsinbedim. Saltanatqa qaýip tónip turǵanyn, ólim men ómirdiń ortasynda turǵanyn bilmedim. Bul aqtalý emes. Men ol jaqta (bólmede) shyn máninde ne bolyp jatqanyn kóre almadym.
Bul meniń kinám jáne men oǵan qatty ókinemin. Eger nazar aýdaryp qarasam múlde basqa jaǵdai bolar edi. Endi amal ne? Men ýaqytynda kómektese almasam da Saltanattyń jaqyndary meni keshire alady dep senemin", - deidi Baijanov.
Ol Saltanat meiramhanaǵa buryn da jii kelgenin aitady.
"Óte meiirimdi edi. Meiramhana qyzmetkerleri Saltanat tarapynan eshqandai dórekilik kórgen emes. Ony kez kelgen qyzmetker rastai alady. Sol túni ne bolǵanyn aityp bereiin. Men 33-temin, qarapaiym otbasynan shyqqanmyn. Áielim, úsh balam bar. Meniń kesirimnen olar da zardap shegip otyr. Olardan da, ata-anamnan da keshirim suraimyn", - deidi Baijanov.
Baijanov gastroortalyqta 2022 jyldan beri direktor qyzmetin atqarǵan.
"Shyn máninde Bishimbaevtyń barlyq jumysyn atqaratynmyn. Onyń jeke jumystary da meniń moinymda. Bishimbaev - ákem jaǵynan alys týysym. Menen 10 jasqa úlken. Minezi aýyr, kez kelgen kezde "jarylyp" kete salady. Kez kelgen ýaqytta habarlasa salatyn, men bailanysty júrýim kerek boldy", - deidi Baijanov.
Osylaisha Baijanov qaiǵyly oqiǵa bolǵan túnniń hronologiiasyn aita bastady.
"8 qarasha ádettegidei jumys kúni edi. Mundai sumdyq jaǵdai bolatynyn, Saltanat mert bolatynyn, men túrmege túsetinim oiyma da kelgen joq. 8 qarashada keshke jumystan úige keldim. Otbasymmen keshki as ishtim. Sol kún týraly bar biletinimdi aitqym keledi.
9 qarashada tańǵy 7-de áli uiyqtap jatqan kezimde maǵan bizdiń kúzetshi habarlasty. Ol Bishimbaev pen Saltanat mas kúide kólik aidap ketpek bolǵanyn aitty. Kólik bordiýrge soqtyǵysqan. Men kúzetshige kóliktiń kiltin alyp alý keregin aittym. Sebebi mundai jaǵdaida kólik aidaý qaýipti dep oiladym. Sosyn 8-der shamasynda meiramhananyń ákimshisi habarlasty. Ol Bishimbaev túni boiy shý shyǵarǵanyn aitty. Qýandyq pen Saltanat túni boiy meiramhanada bolǵanyn, taǵy bir janjal bolǵanyn estidim. Shynymdy aitsam, oǵan tańǵalmadym, sebebi olardyń janjaldaryna etim úirenip qalǵan. Sebebi olar jii ursysatyn. Saltanattyń kózi kógerip júrgenin birneshe ret kórgenmin. Tipti olardyń úiine jihaz jóndeitin mamandardy birneshe ret jibergenmin. Onyń bári telefonymda bar", - deidi Baijanov.
Baijanov tergeýshilerge telefony men qupiiasózin bergenin aitady.
"9 qarashada tańǵy 9.30 shamasynda Bishimbaev habarlasyp, meiramhanaǵa kelýim keregin aitty. Ne úshin ekenin túsindirmedi. Saǵat 10 shamasynda meiramhanaǵa keldim. Ekinshi qabatqa kóterilgen kezde vip-bólmelerdiń birinde jaryq qosylyp turdy. Esikti Bishimbaev ashty. Men kirer kezde Bishimbaev "kirme" dedi. Bishimbaevtan ishimdiktiń iisi múńkip turdy. esik ashylǵan kezde Saltanat divannyń shetinde otyrǵanyn kóz qiyǵymmen baiqap qaldym. Ol qara plash kiip otyrdy. Biraq onyń ishinde kiim bolmady. Sondyqtan durys kóre almadym. Biraq Saltanattyń basy tómen qarap turǵanyn baiqadym. Sondyqtan betindegi jaraqattardy kórmedim. Odan bólek, kabinkanyń astań-kesteńi shyqqanyn baiqadym", - deidi Baqytjan Baijanov.
Artynsha Bishimbaev Baijanovtan kórpeshe ákelýin suraǵan.
"Men vipke kirmedim, kórpeshelerdi Bishimbaevqa berdim. Esik jaqta turdym. Beinekameralarda men vip-bólmege kirip, 4 minýttai turǵandai bolyp qalǵam. Men rasynda kórpesheni berdim, biraq bólmege kirmedim. Esiktiń janynda eki minýttai turyp kúttim", - deidi Baijanov.
Osylaisha, Baqytjan Baijanovtyń sózinshe, ol vip-bólmege kirmegen.
"Eki minýttan keiin Bishimbaev meni ishke kirgizip, úige qaitatynyn aitty. Sol kezde ǵana bólmege kirdim. Saltanattyń tynys alýy jiirek jáne qattyraq bolǵanyn baiqadym. Ol uiyqtap jatyr dep oiladym. Sol kezde qatty mán bermedim. Sebebi olar túni boiy uiyqtamai, ishimdik iship, sharshap jatyr dep oiladym. Endi meniń nemquraidy qaraýymnan ol sharshaǵandyqtan solai tynys alyp jatyr dep oilaǵanymdy túsindim", - deidi Baqytjan Baijanov.
Buǵan deiin sot otyrysynda Baqytjan Baijanovtyń advokaty sotqa ótinish jasaǵan bolatyn. Onyń sózinshe, Baijanov Bishimbaevtan bólek otyrǵysy keletinin aitty.
"Bishimbaevty Baijanovtan alys otyrǵyzý qajet. Baijanov ózine qysym kórsetilip jatyr dep sanaidy. Olardyń arasynda kikiljiń bolyp jatyr. Tym quryǵanda erteńgi otyrysta Qýandyqtan aýlaq otyrsa bolar edi", - dedi Baijanovtyń advokaty.
Keiin muny Bishimbaevtyń inisi Baijanovtyń ózi de rastady.
"Ol maǵan jaýap berý kezinde "bylai ait, bylai ait" dep qysym kórsetip jatyr", - dedi Baijanov.
Baqytjan Baijanovqa Qylmystyq kodekstiń eki baby boiynsha aityp taǵylǵan:
- 432-baby (asa aýyr qylmysty jasyryp qalý);
- 434-baby (asa aýyr qylmysty habarlamaý).
