"Түні бойы шу шығарып, ішімдік ішкен". Бақытжан Байжанов мәлімдеме жасады

Көркем Алдабергенова 11 сәу. 2024 12:23 16671

Қуандық Бишімбаевтың інісі Бақытжан Байжанов сот отырысында мәлімдеме жасады, - деп хабарлайды Dalanews.kz.

Байжанов қайғылы оқиға болған күні Салтанат Нүкенованы бірнеше рет көргенін айтты.

"Салтанаттың бір көзі ісіп тұрғанын көрдім. Вип-бөлменің ішінің астаң-кестеңі шығып жатты, дәретхананың есігі қирағанын көрдім. Таңертең гастроорталыққа келген кезде Бишімбаев түні бойы шу шығарып, ішімдік ішіп, Салтанатты кезекті рет ұрып тастағанын біліп келдім. Бұл туралы гастроорталыққа келер алдында хабардар болдым. Бірақ ол кезде ештеңе түсінбедім. Салтанатқа қауіп төніп тұрғанын, өлім мен өмірдің ортасында тұрғанын білмедім. Бұл ақталу емес. Мен ол жақта (бөлмеде) шын мәнінде не болып жатқанын көре алмадым.

Бұл менің кінәм және мен оған қатты өкінемін. Егер назар аударып қарасам мүлде басқа жағдай болар еді. Енді амал не? Мен уақытында көмектесе алмасам да Салтанаттың жақындары мені кешіре алады деп сенемін", - дейді Байжанов.

Ол Салтанат мейрамханаға бұрын да жиі келгенін айтады.

"Өте мейірімді еді. Мейрамхана қызметкерлері Салтанат тарапынан ешқандай дөрекілік көрген емес. Оны кез келген қызметкер растай алады. Сол түні не болғанын айтып берейін. Мен 33-темін, қарапайым отбасынан шыққанмын. Әйелім, үш балам бар. Менің кесірімнен олар да зардап шегіп отыр. Олардан да, ата-анамнан да кешірім сұраймын", - дейді Байжанов.

Байжанов гастроорталықта 2022 жылдан бері директор қызметін атқарған.

"Шын мәнінде Бишімбаевтың барлық жұмысын атқаратынмын. Оның жеке жұмыстары да менің мойнымда. Бишімбаев - әкем жағынан алыс туысым. Менен 10 жасқа үлкен. Мінезі ауыр, кез келген кезде "жарылып" кете салады. Кез келген уақытта хабарласа салатын, мен байланысты жүруім керек болды", - дейді Байжанов.

Осылайша Байжанов қайғылы оқиға болған түннің хронологиясын айта бастады.

"8 қараша әдеттегідей жұмыс күні еді. Мұндай сұмдық жағдай болатынын, Салтанат мерт болатынын, мен түрмеге түсетінім ойыма да келген жоқ. 8 қарашада кешке жұмыстан үйге келдім. Отбасыммен кешкі ас іштім. Сол күн туралы бар білетінімді айтқым келеді.

9 қарашада таңғы 7-де әлі ұйықтап жатқан кезімде маған біздің күзетші хабарласты. Ол Бишімбаев пен Салтанат мас күйде көлік айдап кетпек болғанын айтты. Көлік бордюрге соқтығысқан. Мен күзетшіге көліктің кілтін алып алу керегін айттым. Себебі мұндай жағдайда көлік айдау қауіпті деп ойладым. Сосын 8-дер шамасында мейрамхананың әкімшісі хабарласты. Ол Бишімбаев түні бойы шу шығарғанын айтты. Қуандық пен Салтанат түні бойы мейрамханада болғанын, тағы бір жанжал болғанын естідім. Шынымды айтсам, оған таңғалмадым, себебі олардың жанжалдарына етім үйреніп қалған. Себебі олар жиі ұрсысатын. Салтанаттың көзі көгеріп жүргенін бірнеше рет көргенмін. Тіпті олардың үйіне жиһаз жөндейтін мамандарды бірнеше рет жібергенмін. Оның бәрі телефонымда бар", - дейді Байжанов.

Байжанов тергеушілерге телефоны мен құпиясөзін бергенін айтады.

"9 қарашада таңғы 9.30 шамасында Бишімбаев хабарласып, мейрамханаға келуім керегін айтты. Не үшін екенін түсіндірмеді. Сағат 10 шамасында мейрамханаға келдім. Екінші қабатқа көтерілген кезде вип-бөлмелердің бірінде жарық қосылып тұрды. Есікті Бишімбаев ашты. Мен кірер кезде Бишімбаев "кірме" деді. Бишімбаевтан ішімдіктің иісі мүңкіп тұрды. есік ашылған кезде Салтанат диванның шетінде отырғанын көз қиығыммен байқап қалдым. Ол қара плащ киіп отырды. Бірақ оның ішінде киім болмады. Сондықтан дұрыс көре алмадым. Бірақ Салтанаттың басы төмен қарап тұрғанын байқадым. Сондықтан бетіндегі жарақаттарды көрмедім. Одан бөлек, кабинканың астаң-кестеңі шыққанын байқадым", - дейді Бақытжан Байжанов.

Артынша Бишімбаев Байжановтан көрпеше әкелуін сұраған.

"Мен випке кірмедім, көрпешелерді Бишімбаевқа бердім. Есік жақта тұрдым. Бейнекамераларда мен вип-бөлмеге кіріп, 4 минуттай тұрғандай болып қалғам. Мен расында көрпешені бердім, бірақ бөлмеге кірмедім. Есіктің жанында екі минуттай тұрып күттім", - дейді Байжанов.

Осылайша, Бақытжан Байжановтың сөзінше, ол вип-бөлмеге кірмеген.

"Екі минуттан кейін Бишімбаев мені ішке кіргізіп, үйге қайтатынын айтты. Сол кезде ғана бөлмеге кірдім. Салтанаттың тыныс алуы жиірек және қаттырақ болғанын байқадым. Ол ұйықтап жатыр деп ойладым. Сол кезде қатты мән бермедім. Себебі олар түні бойы ұйықтамай, ішімдік ішіп, шаршап жатыр деп ойладым. Енді менің немқұрайды қарауымнан ол шаршағандықтан солай тыныс алып жатыр деп ойлағанымды түсіндім", - дейді Бақытжан Байжанов.

Бұған дейін сот отырысында Бақытжан Байжановтың адвокаты сотқа өтініш жасаған болатын. Оның сөзінше, Байжанов Бишімбаевтан бөлек отырғысы келетінін айтты.

"Бишімбаевты Байжановтан алыс отырғызу қажет. Байжанов өзіне қысым көрсетіліп жатыр деп санайды. Олардың арасында кикілжің болып жатыр. Тым құрығанда ертеңгі отырыста Қуандықтан аулақ отырса болар еді", - деді Байжановтың адвокаты.

Кейін мұны Бишімбаевтың інісі Байжановтың өзі де растады.