Jiynǵa ardagerler, ziialy qaýym ókilderi, Qazaqstan, Túrkiia, Ózbekstan memleketteriniń qalamgerleri, buqaralyq aqparat quraldary ókilderi jáne shyǵarmashyl jastar qatysty. Qatysýshylar aldymen Túlkibas aýdanynyń ortalyǵyndaǵy Turar Rysqulov eskertkishine gúl shoǵyn qoiyp, Túrkibasy áýlie kesenesine aialdady. Odan soń Taýpistelidegi Sherhan men Nasyr baýyna jinaldy.
Túlkibas aýdanynyń ákimi Nurbol Turashbekov tabiǵaty tamyljyǵan Túlkibasqa ádebietshilerdiń kelgenine qýanyshty ekenin bildirdi.
Taǵylymdy kezdesýde Qazaqstan Jazýshylar odaǵy basqarmasynyń hatshysy, Memlekettik syilyqtyń laýreaty Esenǵali Raýshanov, Ózbekstan Jazýshylar odaǵy qazaq ádebieti keńesiniń hatshysy, jazýshy, aýdarmashy Mehmanqul Islamqulov, Qazaqstannyń Qurmetti jýrnalisi Baidýlla Qonysbek, Túrkiia Respýblikasynyń ókili, belgili ǵalym Q.A.Iasaýi atyndaǵy HQTÝ-dyń túrik filologiiasy kafedrasynyń meńgerýshisi Asyl Shengún, halyqaralyq «Alash» syilyǵynyń laýreaty, K.Simonov medaliniń iegeri Narmahan Begalyuly jáne Nesipbek Dáýtaiuly jáne ózge de aqyn-jazýshylar qos qalamger jaily tolǵanystaryn, qoǵam, ádebiet, rýhaniiat týraly keleli oilaryn aitty. Ádebiet, jýrnalistika jaily usynystaryn, jas talanttar týraly oi-pikirlerin bildirdi.
Áserli júzdesýde qalamger aǵalar ádebietke qadam basqan jastarǵa bata berip, aq jol tiledi. Basqosý barysynda Sherhan Murtaza men Nasyr Fazyldyń shyǵarmalarynan úzindiler usynylyp, kontserttik baǵdarlamamen súiemeldendi. Ádebi jiyn sońynda qalamgerler Boztorǵai asýyna saiahat jasady.
Túrkistan oblystyq Óńirlik kommýnikatsiialar qyzmeti
