Májilis depýtaty Baqytjan Bazarbek jerdi zańsyz bergen belgili sheneýnikterdiń esimin atady, dep habarlaidy Dalanews.kz.
Onyń aitýynsha, "zańsyz berilgen jer" máselesi birneshe ret kóterilip, tipti sotqa deiin barǵan.
"Barlyq óńirdi aralap, tiisti tekseris jumysyn júrgizdim. Almaty, Shymkent, Atyraý qalalary, Almaty oblysy, Jetisý jáne Túrkistan oblysy boiynsha tiisti qaýlylardy kóterdik. Týyndaityn suraq óte kóp. Bir ǵana mysal keltireiin. Almaty qalasyn alatyn bolsaq, munda birtalai qaýlyny qaraǵanbyz. Olardy tekserýden bólek, sottyń sheshimderi bar zań kúshine engen. Al sot sheshimine sáikes ákimder jerdi zańsyz bergeni anyqtaldy. Jer kodeksiniń 43, 44 – 1, 49-1 baptaryn qatań túrde buzyp, jerdi berdi degen sottyń sheshimderi bar. Olar - Ahmetjan Esimov, Imanǵali Tasmaǵambetov, Baýyrjan Baibek. Tipti men ózim zańger retinde Baibek ákim bolǵan kezinde úsh qaýlysyn zańsyz dep taný týraly sotqa talap-aryz berip, sonyń eki qaýlysyn sottyń sheshimi boiynsha buzdyrtqanmyn. Máselen, bárimizge belgili "Rahat" bazarynyń úlken jerin "TKM" JShS quqyǵyn shektep, "Almaty SPS" firmasyna berip jibergen. Al "Almaty SPS" artynda sol Eski Qazaqstannyń ókilderi tur. Iaǵni Baýyrjan Baibektiń jaqyn týystarynyń atyna rásimdelgen TOO-lar. Sóitip biz olardy sotqa berip, 3 jyl sottastyq. 2022 jyly Almaty qalalyq sotynyń sheshimimen "Almaty SPS" firmasyna berilgen jer zańsyz ekeni aitylyp, tiisti sottyń sheshimi shyqty. Basqa memleketterde bul qaýlyny alyp, prokýratýraǵa jiberedi. Prokýratýrada qylmystyq is qozǵaýǵa bolatyn edi", - deidi Baqytjan Bazarbek Adal Adam YouTube arnasyna bergen suhbatynda.
Budan bólek depýtat Almatynyń aporty máselesine toqtalyp ótti.
"Alma baqtaryn alyp qarastyraiyqshy. "Gornyi gigant" degen alma baǵyna Hamyraevtar otbasy ielik etedi. Sol otbasyǵa tiesili jer basynda memlekettik menshikke qaitarylǵan. Almatydaǵy alma baqtarynyń ózi joq bolyp ketken ǵoi. Sol aport almalary. Qazir biz týristik sektordy damytý úshin de týristik ónim retinde almatynyń aportyn usynyp otyrmyz. Keshe ǵana Toqaev Italiiaǵa baryp tanystyrǵan edi. Al is júzinde aportty ósiretin barlyq jerge kottedj úi soǵyp tastaǵan ári záýlim penthaýstar boi kótergen. Aporttyń bárin kesip tastaǵan. Qazir almatynyń aporty tek eki jerde ósedi. Bul kishigirim saiajai, úilerdegi aportty almaǵan kezde. Myń baqtyń ishinde ekeýi ǵana qaldy. Ol qazir tek Talǵar jáne Qarasai aýdanynda ǵana ósedi. Sol Hamyraevtardyń jerine Esimov, Tasmaǵambetov, Baibek, Saǵyntaevtyń qatysy bar. Eń sońynda biz "Jer amanaty" komissiiasynyń nátijesinde Saǵyntaevtyń qol qoiǵan qaýlysyn buzdyq. Sottyń sheshimi boiynsha zańsyz dep tanydyq. Alysqa barýdyń qajeti joq. Mysaly, KazGÝ-dyń jerine qatysty Baýyrjan Baibek, Saǵyntaevtyń bes qaýlysyn jáne tórt jalǵa alý shartyn zańsyz dep tanydyq. Úsh qaýlysy áli bar, buzylmaǵan. Osyǵan uqsas qaýlylardyń Almaty qalasy boiynsha birnesheýin buzdyrttym", - deidi Bazarbek.
