Oqý-aǵartý ministri Ǵani Beisembaev elimizdegi jekemenshik mektepterge qatysty alańdaýshylyq bildirdi, dep habarlaidy Dalanews.kz.
“Keibir jekemenshik mektepterge qatysty óte kóp másele bar. Ol qai qalada jáne qandai mektep ekenin uialtpai, atamai-aq qoiaiyn. Biraq qajet bolǵan jaǵdaida túsin tústep, atyn atap berýge bolady dep oilaimyn. Birinshi kezekte týysqandyq printsiptermen mekteptiń muǵalimderin, basshylyǵyn taǵaiyndaý beleń alyp otyrǵanyn kórip otyrmyz. Elimizdegi keibir jekemenshik mektepterde bilimge qatysy joq adamdardy basshylyqqa taǵaiyndaý, týysqanyn muǵalim retinde qabyldaý máseleleri anyqtalǵan” - deidi ministr.
Sonymen qatar ministr jeke mektepterdiń ataýyna qatysty da pikir bildirdi. Jekemenshik mektepterdiń kópshiligine oiyna kelgen attardy qoiyp, bilim berý litsenziiasyna sai kelmeitin jaǵdailar tirkelgen. Oǵan qosa, memleketke tiesili eki mekteptiń ortasyna jekemenshik mektep salyp, túrli joldarmen oqýshylardy ózderine tartý áreketteri de baiqalǵan.
“Biz taza, ádiletti básekelestikti týyndatýymyz kerek. Bir jaǵynan ondai mektepterdiń kóp emestigi qýantyp otyr. Jaqsy, taza, adal jumys istep jatqan mektepter bar. Olardy qysqartý, jabý qaýpi joq. Al endi sapasyz, tek aqsha tabý úshin jumysyn uiymdastyryp jatqan mektepterge suraq bolady”, - dedi ol.
Ministrdiń sózinshe, zańǵa sai jumys istemegen birneshe mektep jabylyp ta úlgergen. Olardyń keibiri tipti jertólede ornalasyp, oqýshylardy aldap jinaǵan.
“Bul mektepter ata-analardy alaiaqtyq jolmen shaqyryp alǵan”, - deidi Ǵani Beisembaev.
