Úkimet 11 myń shaqyrym avtojoldy jańǵyrtyp, eldegi áýejailardyń ótkizý qabiletin 40 mln jolaýshyǵa deiin arttyrýdy kózdep otyr, dep habarlaidy Dala News.
Prezident Qasym-Jomart Toqaevtyń tóraǵalyǵymen ótken Úkimettiń keńeitilgen otyrysynda Premer-ministr Oljas Bektenov kólik-logistika salasy el ekonomikasy úshin strategiialyq baǵytqa ainalǵanyn málimdedi. Onyń aitýynsha, biyl uzyndyǵy 475 shaqyrym bolatyn eki temirjol jelisiniń qurylysy aiaqtalyp, 2,9 myń shaqyrym jol jańǵyrtylady.
Aldaǵy jyldary 11 myń shaqyrym avtomobil jolyn salý men qaita jańartý josparlanǵan. Bul Qazaqstan arqyly ótetin tranzittik tasymal kólemin 60%-ǵa arttyryp, konteinerlik poiyzdardyń qozǵalys jyldamdyǵyn saǵatyna 50 shaqyrymǵa deiin jetkizbek. Nátijesinde Qytaidan Kaspiige deiingi júk jetkizý ýaqyty 84 saǵattan 55 saǵatqa deiin qysqarady.
Úkimet temirjol infraqurylymynyń tozýy tranzittik serpinge basty kedergi bolyp otyrǵanyn moiyndap otyr. Osyǵan bailanysty magistraldyq temirjol jelilerin jańǵyrtýǵa arnalǵan keshendi baǵdarlama turaqty baqylaýǵa alynǵan.
Aviatsiia salasynda da túbegeili ózgerister kútilýde. Biyl Astana áýejaiynda ekinshi ushý-qoný jolaǵynyń qurylysy bastalady. Bul 20 jyl boiy jóndeý kórmegen negizgi jolaqty jańǵyrtýǵa múmkindik berip, elordalyq áýejaidyń ótkizý qabiletin tórt esege arttyryp, jylyna 40 mln jolaýshyǵa deiin jetkizedi.
Almaty áýejaiynda shilde aiynda ishki terminal tolyq jańartylyp, jolaýshy ótkizý múmkindigi 14 mln-nan 19 mln-ǵa deiin ósedi. Sonymen birge ushý-qoný jolaǵyn qaita jańǵyrtý jumystary qolǵa alynady.
Sonymen qatar aviaotyn baǵasynyń tómendeýi de strategiialyq sheshim retinde baǵalanyp otyr. Baǵa $1,2 myńnan $950 deńgeiine tústi. Bul Qazaqstannyń áýe keńistigin halyqaralyq aviakompaniialar úshin básekege qabiletti etýge baǵyttalǵan.
Osylaisha, Úkimet Qazaqstandy tek tranzittik el emes, óńirlik kólik-logistika habyna ainaldyrýdy kózdep otyr.
