ٷكٸمەت 11 مىڭ شاقىرىم اۆتوجولدى جاڭعىرتىپ, ەلدەگٸ ەۋەجايلاردىڭ ٶتكٸزۋ قابٸلەتٸن 40 ملن جولاۋشىعا دەيٸن ارتتىرۋدى كٶزدەپ وتىر, دەپ حابارلايدى Dala News.
پرەزيدەنت قاسىم-جومارت توقاەۆتىڭ تٶراعالىعىمەن ٶتكەن ٷكٸمەتتٸڭ كەڭەيتٸلگەن وتىرىسىندا پرەمەر-مينيستر ولجاس بەكتەنوۆ كٶلٸك-لوگيستيكا سالاسى ەل ەكونوميكاسى ٷشٸن ستراتەگييالىق باعىتقا اينالعانىن مەلٸمدەدٸ. ونىڭ ايتۋىنشا, بيىل ۇزىندىعى 475 شاقىرىم بولاتىن ەكٸ تەمٸرجول جەلٸسٸنٸڭ قۇرىلىسى اياقتالىپ, 2,9 مىڭ شاقىرىم جول جاڭعىرتىلادى.
الداعى جىلدارى 11 مىڭ شاقىرىم اۆتوموبيل جولىن سالۋ مەن قايتا جاڭارتۋ جوسپارلانعان. بۇل قازاقستان ارقىلى ٶتەتٸن ترانزيتتٸك تاسىمال كٶلەمٸن 60%-عا ارتتىرىپ, كونتەينەرلٸك پويىزداردىڭ قوزعالىس جىلدامدىعىن ساعاتىنا 50 شاقىرىمعا دەيٸن جەتكٸزبەك. نەتيجەسٸندە قىتايدان كاسپييگە دەيٸنگٸ جٷك جەتكٸزۋ ۋاقىتى 84 ساعاتتان 55 ساعاتقا دەيٸن قىسقارادى.
ٷكٸمەت تەمٸرجول ينفراقۇرىلىمىنىڭ توزۋى ترانزيتتٸك سەرپٸنگە باستى كەدەرگٸ بولىپ وتىرعانىن مويىنداپ وتىر. وسىعان بايلانىستى ماگيسترالدىق تەمٸرجول جەلٸلەرٸن جاڭعىرتۋعا ارنالعان كەشەندٸ باعدارلاما تۇراقتى باقىلاۋعا الىنعان.
اۆياتسييا سالاسىندا دا تٷبەگەيلٸ ٶزگەرٸستەر كٷتٸلۋدە. بيىل استانا ەۋەجايىندا ەكٸنشٸ ۇشۋ-قونۋ جولاعىنىڭ قۇرىلىسى باستالادى. بۇل 20 جىل بويى جٶندەۋ كٶرمەگەن نەگٸزگٸ جولاقتى جاڭعىرتۋعا مٷمكٸندٸك بەرٸپ, ەلوردالىق ەۋەجايدىڭ ٶتكٸزۋ قابٸلەتٸن تٶرت ەسەگە ارتتىرىپ, جىلىنا 40 ملن جولاۋشىعا دەيٸن جەتكٸزەدٸ.
الماتى ەۋەجايىندا شٸلدە ايىندا ٸشكٸ تەرمينال تولىق جاڭارتىلىپ, جولاۋشى ٶتكٸزۋ مٷمكٸندٸگٸ 14 ملن-نان 19 ملن-عا دەيٸن ٶسەدٸ. سونىمەن بٸرگە ۇشۋ-قونۋ جولاعىن قايتا جاڭعىرتۋ جۇمىستارى قولعا الىنادى.
سونىمەن قاتار اۆياوتىن باعاسىنىڭ تٶمەندەۋٸ دە ستراتەگييالىق شەشٸم رەتٸندە باعالانىپ وتىر. باعا $1,2 مىڭنان $950 دەڭگەيٸنە تٷستٸ. بۇل قازاقستاننىڭ ەۋە كەڭٸستٸگٸن حالىقارالىق اۆياكومپانييالار ٷشٸن بەسەكەگە قابٸلەتتٸ ەتۋگە باعىتتالعان.
وسىلايشا, ٷكٸمەت قازاقستاندى تەك ترانزيتتٸك ەل ەمەس, ٶڭٸرلٸك كٶلٸك-لوگيستيكا حابىنا اينالدىرۋدى كٶزدەپ وتىر.
