Búgin Memleket basshysy Qasym-Jomart Toqaev pen Bolgarıa Prezıdenti Rýmen Radev BAQ ókilderi aldynda sóılegen sózinde kólik-logıstıka sektoryndaǵy baılanysty damytý máselesine nazar aýdarylǵany, taraptar búginde strategıalyq saýda jolynyń birine aınalǵan Transkaspıı halyqaralyq kólik dálizi jobasyna Bolgarıanyń "Býrgas" jáne "Varna" teńiz porttaryn qosý máselesin qarastyrýǵa keliskeni belgili boldy, dep habarlaıdy Dalanews.kz.
Prezıdent eń aldymen, shaqyrýyn qabyl alyp, Qazaqstanǵa alǵash ret resmı saparmen kelgeni úshin Rýmen Radevke shynaıy rızashylyǵyn jetkizdi.
"Bolgarıa – Qazaqstannyń Ońtústik-SHyǵys Eýropadaǵy mańyzdy ári senimdi seriktesi. Bizdiń yqpaldastyǵymyz myzǵymas dostyq pen túsinistikke negizdelgen. Jalpy, Qazaqstan Bolgarıany strategıalyq mańyzy bar seriktes retinde qabyldaıdy jáne sizdiń memleketińizben qarym-qatynasty odan ári damytýǵa úlken mán berýde. Qazaqstan men Bolgarıa arasynda dıplomatıalyq qatynas ornaǵanyna ótken aptada 33 jyl toldy. Sizdiń saparyńyz osy mereıli mejege tuspa-tus kelip otyr. Osy ýaqyt ishinde bizdiń elderimiz barlyq deńgeıde ózara senim rýhyndaǵy saıası dıalog ornatty. Naqty sharttyq-quqyqtyq negiz qalyptasty. Eki eldiń saýda-ekonomıkalyq jáne ınvestısıalyq baılanystary nyǵaıa tústi", – dedi Memleket basshysy.
Qasym-Jomart Toqaevtyń aıtýynsha, elimizde tatý-tátti ómir súrip jatqan túrli etnostar qatarynda bolgar ultynyń ókilderi de bar. Osy erekshe baılanys halyqtarymyz arasyndaǵy yntymaqtastyqty arttyra túsedi.
Prezıdent qos memlekettiń halyqaralyq uıymdar aıasyndaǵy yqpaldastyǵy da keńeıip kele jatqanyna toqtaldy. Jan-jaqty ári senimdi seriktestik aldaǵy ýaqytta da bekı bermek.
Memleket basshysy búgingi kelissóz mazmundy bolǵanyna, naqty ýaǵdalastyqtarǵa qol jetkizilgenine mán berdi
"Atap aıtqanda, saýda-ekonomıka jáne ınvestısıa salasyndaǵy baılanystyń aýqymyn keńeıtýge basa nazar aýdardyq. Eki el arasyndaǵy alys-beris ósip jatyr, bul – jaqsy úderis. Elimizde 60-qa jýyq bolgar kompanıasy bar. Olar túrli salada tabysty jumys istep jatyr. Degenmen elderimizdiń ekonomıkalyq áleýeti budan áldeqaıda joǵary. Sondyqtan bul kórsetkishti ulǵaıta túsýge mol múmkindik bar. Biz ózara saýda-sattyq kólemin arttyra túsýge kelistik. Qos memlekettiń múddesine saı keletin jańa ınvestısıalyq jobalardy pysyqtaýǵa ýaǵdalastyq. Ásirese, munaı-gaz, jańartylatyn energıa, "jasyl" energetıka, atom ónerkásibi, sıfrlandyrý, ınovasıa, jasandy ıntellekt, ǵarysh salasy, aýyl sharýashylyǵy, densaýlyq saqtaý, mádenı-gýmanıtarlyq baılanystar jáne týrızm sıaqty salalarda birlesken jobalardy júzege asyrý mańyzdy ekenin atap óttik", – dedi Prezıdent.
Sondaı-aq kólik-logıstıka sektoryndaǵy baılanysty damytý máselesine nazar aýdaryldy.
Taraptar búginde strategıalyq saýda jolynyń birine aınalǵan Transkaspıı halyqaralyq kólik dálizi jobasyna Bolgarıanyń "Býrgas" jáne "Varna" teńiz porttaryn qosý máselesin qarastyrýǵa kelisti.
Memleket basshysy bul jumysqa eki eldiń Ekonomıkalyq yntymaqtastyq jónindegi úkimetaralyq komısıasy basa mán berý qajet dep sanaıdy. Prezıdent Komısıa aıasynda Kólik-logıstıka salasyndaǵy yntymaqtastyq jónindegi birlesken jumys tobyn qurýdy usyndy.
"Budan bólek, Bolgarıanyń ǵaryshtyq zertteýler men tehnologıalar, qorǵanys ónerkásibi salasyndaǵy ozyq tájirıbesin zerdelep, birlese jumys isteýge daıyn ekenimizdi jetkizdim. Elimizge Prezıdent Rýmen Radevpen birge Bolgarıanyń iri kásipkerleri keldi. Búgin bıznes forým ótedi, birqatar komersıalyq qujatqa qol qoıylady. Bıznes-forýmǵa biz, eki el basshylary da qatysatyn boldyq. Bul ekijaqty yntymaqtastyqqa aıryqsha mán beriletinin ańǵartady. Biz elimizde jumys istegisi keletin Bolgarıa kompanıalaryna qolaıly jaǵdaı jasaýǵa daıynbyz. Men isker toptardyń yqpaldastyǵyn nyǵaıtý úshin "Qazaqstan – Bolgarıa" iskerlik keńesin qurýdy usyndym", – dedi Qasym-Jomart Toqaev.
Memleket basshysy mádenı-gýmanıtarlyq, bilim berý jáne óńiraralyq baılanys salasyndaǵy yntymaqtastyqty damytýǵa ýaǵdalasqanyn jetkizdi
2018 jyly Sofıa qalasynda Astana kóshesi paıda boldy. Endi jaqyn arada elordada Sofıa atty kóshe ashylmaq. Prezıdenttiń aıtýynsha, jalpy, kelissózder tabysty ótti deýge tolyq negiz bar. Birqatar mańyzdy qujatqa qol qoıyldy. Jasalǵan kelisimder nátıjesinde eki eldiń yntymaqtastyǵy jańa deńgeıge kóterilmek.
Qasym-Jomart Toqaev Rýmen Radevpen aımaqtyq jáne jahandyq kún tártibindegi ózekti máselelerdi de talqylaǵanyn aıtty.
"Álemdegi kóptegen túıtkilge qatysty eki eldiń ustanymy – uqsas. Biz bir-birimizdiń bastamalarymyzdy únemi qoldap kelemiz. Kópjaqty qurylymdar aıasyndaǵy yqpaldastyǵymyz oıdaǵydaı damýda. Men Almatyda Birikken Ulttar Uıymynyń Ortalyq Azıa men Aýǵanstandy damytý ortalyǵyn ashý týraly bastamany qoldaǵany úshin bolgar tarapyna, Prezıdent myrzaǵa zor alǵys aıttym. Álemdegi kúrdeli geosaıası ahýal men túrli qaqtyǵystar elderimizdi alańdatyp otyrǵany sózsiz. Qos tarap ta barlyq túıtkildi beıbit jáne saıası-dıplomatıalyq jolmen sheshý qajet dep sanaıdy. Biz kópjaqty dıplomatıany odan ári damytýǵa erekshe mán beremiz. Bolashaqta da halyqaralyq deńgeıde kúsh-jigerimizdi biriktirip, úılesimdi jumys isteýge, beıbitshilik pen turaqtylyqty nyǵaıtý isine belsene qatysýǵa kelistik. Bul sapar Qazaqstan men Bolgarıanyń qarym-qatynasyn tyń qarqynmen damytýǵa jol ashady dep senemin", – dedi Memleket basshysy.
🇧🇬 Rýmen Radev taraptar qyzyǵýshylyq tanytatyn barlyq sala boıynsha ekijaqty qarym-qatynasqa salmaqty taldaý jasalǵanyn atap ótti. Onyń aıtýynsha, yqpaldastyqty nyǵaıtýǵa zor áleýet bar.
"Búgingi kelissózderdiń qorytyndysy ózara yntymaqtastyqqa tyń serpin beretinine senimdimin. Transkaspıı kólik dálizin odan ári damytý jónindegi memorandýmǵa qol qoıylýy eki el arasyndaǵy baılanystardy ilgeriletýge nıetti ekenimizdi kórsetedi. Osy oraıda Qazaqstan men Bolgarıanyń geografıalyq turǵydan ornalasýyn barynsha tıimdi paıdalaný kerek. Óıtkeni bul baǵyt Azıa men Eýropany jalǵaıdy. Sonymen qatar júk tasymaly, energetıka jáne sıfrlandyrý salalarynda ǵana emes, mádenı baılanystarymyzdy keńeıtýde de múmkindik mol", – dedi Bolgarıa Prezıdenti.
