Qasym-Jomart Toqaev álem betpe-bet kelip otyrǵan jańa syn-qaterlerge qatysty pikir bildirdi, – dep habarlaidy Dalanews.kz.
"Barshańyzǵa belgili, jahandyq saýda soǵysynyń órshýi saldarynan dúnie júzinde kúrdeli ahýal qalyptasyp keledi. Eger mundai teketires oryn alsa, onyń zardabyn barlyq el tartady. Oǵan esh kúmán joq. Bul rette biz Prezident Tramptyń atalǵan qaqtyǵysqa qatysy bar elderdiń ustanymdaryn naqtylap, múmkindiginshe kelissóz bastaý úshin 90 kún moratorii jariialaý týraly baiypty sheshimin quptaimyz", - dedi Prezident.
Memleket basshysy munaiǵa qatysty ahýal jaiynda da pikir bildirdi.
"Sarapshylar elderdiń bir-birine qarsy tarifter engizýi álem ekonomikasynyń quldyraýyna túrtki bolyp, halyqaralyq saýda-sattyqtyń búkil erejesin tas-talqan etýi, tipti, onyń sońy qarýly qaqtyǵystarǵa deiin ulasýy múmkin dep eskertedi. Apta basynda barlyq negizgi indeksterdiń máni tómendep, munai baǵamy barreline 60 dollardan aspady. Alaida Amerika biligi tarifterdi keiinge qaldyrý týraly sheshimin jariialaǵan soń, birjadaǵy baǵalar ósti. Qazir jaǵdai birshama turaqtalǵany baiqalǵanymen, álemdik qor naryǵy men shikizat birjalary buryn-sońdy bolmaǵan mazasyz kúige túsip tur.
Álemniń qatań tariftik qaqtyǵystar saiasatyna kóshkeni anyq. Áńgime kezekti retsessiia jaiynda ǵana emes, jahandyq ekonomikanyń irgesin shaiqap, halyqaralyq qatynastar júiesine aýyr zardabyn tigizetin daǵdarysqa bet alǵanymyzda bolyp otyr. Biz qazirgi ahýaldy muqiiat saraptap, barlyq qaýip-qaterdi eskerip jatyrmyz. Eshbir qiyndyqqa qaramastan, Qazaqstan jan-jaqty jańǵyrý jolynan aýytqymaidy, strategiialyq baǵdarymyz da ózgermeidi. Biz infraqurylym, kólik, ónerkásip, aýyl sharýashylyǵy, tsifrlandyrý jáne basqa da baǵyttar boiynsha iri jobalarymyzdy júzege asyra beremiz. Jumys toqtamaidy. Sondai-aq, árine, memleketimiz áleýmettik mindettemelerin oryndaidy, – dedi Qasym-Jomart Toqaev.
