Qazaqstan AQSh tarapymen kelissóz júrgizip jatqany belgili boldy,- dep habarlaidy Dalanews.kz.
Bul týraly Saýda jáne integratsiia ministrliginiń Syrtqy saýda qyzmeti departamentiniń direktory Serik Áshitov málimdedi.
"9 sáýirde Amerika Qurama Shtattary joǵary tarifti engizý jumystaryn 90 kúnge keiinge qaldyratynyn jariialady. Búginde Qazaqstan Úkimeti elimizge joǵary tarif engizilmeýi úshin AQSh-pen keńesti bastady", - dedi Áshitov ÓKQ brifinginde.
Serik Áshitov AQSh engizip jatqan sharalar Amerikaǵa baǵyttalatyn qazaqstandyq eksporttyń 4,8 paiyzyna ǵana áser etetinin málimdedi. Onyń sózinshe, AQSh-qa baǵyttalatyn, qazaqstandyq eksporttyń shamamen 90 paiyzy bolatyn munai, ýran, kúmis, ferroqorytpa siiaqty negizgi eksport taýarlaryna bul áser etpeidi.
"Bul sharalardy engizý Qazaqstan eksportyna aitarlyqtai áser etedi deýge negiz joq. Soǵan qaramastan Úkimet pen Saýda jáne integratsiia ministrligi osyndai birjaqty sharalardyń saldaryn azaitý jáne saýda qatynasyn nyǵaitý úshin amerikalyq áriptestermen jumysty jalǵastyrady", - dedi departament basshysy.
Aita keteiik, buǵan deiin AQSh prezidenti Donald Tramp 185 elge, sonyń ishinde Qazaqstanǵa baj salyǵyn engizetini habarlandy.
