Donald Tramptyń tarifterge qatysty 90 kúnge "demalys" jariialaǵany týraly jańalyqtan keiin bir túnde Brent markaly munaidyń bir barreli 60-tan 65 dollarǵa kóterilip, birneshe kúngi quldyraýdan keiin azdap "basyn tiktedi". Alaida tańerteń baǵa 64 dollarǵa qaita azdap tómendedi, dep habarlaidy Dalanews.kz.
Naqtyraq aitqanda, AQSh prezidenti ózi engizgen jańa tarifterdi 75 elge qatysty ýaqytsha toqtatty. Olar - Qytai men Eýropalyq odaq sekildi qarsy shara qabyldamai, kelissóz júrgizýge daiyn ekendikterin bildirgen elder. Al Qytai importtaryna engizilgen baj salyǵy kún ótken saiyn zoraiyp, 125%-ǵa bir-aq jetti. Buǵan AQSh ákimshiligi "qurmet tanytpaý" jáne Pekinniń shaǵylystyrý tásiline júginýi túrtki ekenin aitady. Qalai bolǵanda da naq osy shara álemdik naryqtardaǵy baǵalarǵa, tipti iri korporatsiia aktsiialarynyń qunyna da teris áser etýde. Bul jait, ásirese, munai tabysyna bailanǵan Qazaqstandy da sastyrýda. Keshe keshkisin Memleket basshysy Qasym-Jomart Toqaev Úkimet basshysy men Ulttyq Bank tóraǵasynyń qatysýymen shuǵyl jiyn ótkizdi. Jiynda álemdik naryqtaǵy tariftik qaqtyǵystardyń saldarynan energetika resýrstary jáne negizgi taýarlar baǵasynyń quldyraýyna bailanysty el ekonomikasynda qalyptasqan ahýal qaraldy. Al Úkimet el damýynyń pessimistik stsenariin ázirleýdi qolǵa aldy. Onda da munaidyń bir barreli 55-50 dollar bolǵan jaǵdaida degenge daiyndyq turǵysynda.
Saiasattanýshy Ǵaziz Ábishevtiń pikirinshe, munai baǵasyndaǵy ózgeristerge saýda soǵysy áser etti dep esepteidi.
"Donald Tramp saýda soǵysyn 90 kúnge toqtatyp qoidy. Osydan keiin Brent munaiynyń baǵasy birden 64 dollarǵa kóterildi. Sirá, jahandyq saýda soǵysy tym kóp mańyzdy múddelerge áser etken siiaqty", – deidi saiasattanýshy.
Al ekonomist Ǵalymjan Aitqazin munai baǵasynyń azdap kóterilýi men Tramptyń sońǵy sheshimi ǵalamdyq retsessiia qaýip-qateri tómendep, saýda-sattyq aǵyny qalpyna keledi degen úmit otyn tutandyratyn belgili ekenin aitady.
"Árine, Tramp jariialaǵan úzilis kelissózderge múmkindik beredi, biraq jaǵdaidyń qaita ýshyǵýyna kepildik bola almaidy. Óitkeni AQSh pen Qytai arasyndaǵy saýda shielenisi áli saqtalyp otyr, demek ǵalamdyq ekonomikaǵa qatysty qaýip-qater de áli tolyǵymen seiilgen joq. Aldaǵy aptada, menińshe, naryqtaǵy jaǵdailardan góri, kelissózder hattamalary áldeqaida erekshe ról atqaratyn bolady", - deidi ol.
Goldman Sachs Tramptyń tarifter boiynsha úzilis jariialaǵany týraly málimdemesinen soń óz boljamyn qaita ózgertti.
"Qazir biz retsessiiany qarastyrmaityn bazalyq boljamymyzǵa qaita oralýdamyz. Oǵan sáikes, 2025 jyly JIÓ ósimi - 4Q, infliatsiia - 3,5%, retsessiia yqtimaldylyǵy 45% dep boljanady. Al Federaldy rezerv bazalyq mólsherlemeni 25 bazalyq pýnkten maýsym, shilde, qyrkúiek ailarynda úsh ret qatarynan tómendetýi múmkin", delingen amerikalyq investitsiialyq banki habarlamasynda.
Bul da "álemdik naryqtardaǵy alasapyran basylady" dep kóptiń úkilegen úmitine de azdap bolsyn arqaý.
Buǵan deiin saitymyzda "Munaidyń bir barreli 40 dollarǵa deiin arzandaýy múmkin - Goldman Sachs" atty maqala jariialanǵan bolatyn.
