AQSh prezidenti Donald Tramp transgender áielderdi áielder sportynan shettetý týraly jarlyqqa qol qoidy, dep habarlaidy Dalanews.kz.
Tramp jarlyqqa 5 aqpanda qol qoidy.
Jarlyqtyń negizgi tarmaqtary:
«Keeping Men Out of Women’s Sports» («Erlerdi áielder sportynan shettetý») dep atalatyn qujat AQSh-tyń IX bóliminiń negizinde qabyldandy. Bul bólim federaldy qarjylandyrý alatyn oqý oryndarynda jynystyq kemsitýshilikke tyiym salady.
Bul jarlyq transgender sportshylardy áielder komandalaryna qabyldaǵan mektepter men kolledjderdi federaldy qarjylandyrýdan aiyrady. Jarlyqtyń maqsaty – áielder sportynyń «ádildigi men tutastyǵyn» qorǵaý.
Tramp bul sheshimdi áielder sportynyń qaýipsizdigi men ádildigin qamtamasyz etý úshin qabyldaǵanyn málimdedi. Onyń aitýynsha, «áielder sportyna jasalǵan soǵys aiaqtaldy», endi «er adamdar» áieldermen básekelese almaidy.
Halyqaralyq deńgeidegi ózgerister:
Tramp Memlekettik departamentke Halyqaralyq Olimpiada komitetine (HOK) transgender sportshylardy áielder jarystaryna qatystyrmaý úshin qysym jasaýdy tapsyrdy.
Sonymen qatar, AQSh aýmaǵynda ótetin sporttyq jarystarǵa qatysýǵa nietti sheteldik transgender sportshylarǵa viza berýden bas tartý usynyldy. Bul saiasat 2028 jyly Los-Andjeleste ótetin Olimpiada oiyndaryna da áser etýi múmkin.
Alaida jarlyq adam quqyqtaryn qorǵaýshy uiymdar tarapynan synǵa ushyrady. Olar qujattyń transgender adamdarǵa qatysty kemsitýshilik sipaty bar dep esepteidi. Sarapshylar bul jarlyq sotta daý týdyrýy múmkin dep boljap otyr.
