اقش پرەزيدەنتى دونالد ترامپ ترانسگەندەر ايەلدەردى ايەلدەر سپورتىنان شەتتەتۋ تۋرالى جارلىققا قول قويدى، دەپ حابارلايدى Dalanews.kz.
ترامپ جارلىققا 5 اقپاندا قول قويدى.
جارلىقتىڭ نەگىزگى تارماقتارى:
«Keeping Men Out of Women’s Sports» («ەرلەردى ايەلدەر سپورتىنان شەتتەتۋ») دەپ اتالاتىن قۇجات اقش-تىڭ IX ءبولىمىنىڭ نەگىزىندە قابىلداندى. بۇل ءبولىم فەدەرالدى قارجىلاندىرۋ الاتىن وقۋ ورىندارىندا جىنىستىق كەمسىتۋشىلىككە تىيىم سالادى.
بۇل جارلىق ترانسگەندەر سپورتشىلاردى ايەلدەر كوماندالارىنا قابىلداعان مەكتەپتەر مەن كوللەدجدەردى فەدەرالدى قارجىلاندىرۋدان ايىرادى. جارلىقتىڭ ماقساتى – ايەلدەر سپورتىنىڭ «ادىلدىگى مەن تۇتاستىعىن» قورعاۋ.
ترامپ بۇل شەشىمدى ايەلدەر سپورتىنىڭ قاۋىپسىزدىگى مەن ادىلدىگىن قامتاماسىز ەتۋ ءۇشىن قابىلداعانىن مالىمدەدى. ونىڭ ايتۋىنشا، «ايەلدەر سپورتىنا جاسالعان سوعىس اياقتالدى»، ەندى «ەر ادامدار» ايەلدەرمەن باسەكەلەسە المايدى.
حالىقارالىق دەڭگەيدەگى وزگەرىستەر:
ترامپ مەملەكەتتىك دەپارتامەنتكە حالىقارالىق وليمپيادا كوميتەتىنە (حوك) ترانسگەندەر سپورتشىلاردى ايەلدەر جارىستارىنا قاتىستىرماۋ ءۇشىن قىسىم جاساۋدى تاپسىردى.
سونىمەن قاتار، اقش اۋماعىندا وتەتىن سپورتتىق جارىستارعا قاتىسۋعا نيەتتى شەتەلدىك ترانسگەندەر سپورتشىلارعا ۆيزا بەرۋدەن باس تارتۋ ۇسىنىلدى. بۇل ساياسات 2028 جىلى لوس-اندجەلەستە وتەتىن وليمپيادا ويىندارىنا دا اسەر ەتۋى مۇمكىن.
الايدا جارلىق ادام قۇقىقتارىن قورعاۋشى ۇيىمدار تاراپىنان سىنعا ۇشىرادى. ولار قۇجاتتىڭ ترانسگەندەر ادامدارعا قاتىستى كەمسىتۋشىلىك سيپاتى بار دەپ ەسەپتەيدى. ساراپشىلار بۇل جارلىق سوتتا داۋ تۋدىرۋى مۇمكىن دەپ بولجاپ وتىر.
